27 تامىزدا اقش-تىڭ رەسەيگە ۇلىبريتانيا ەكس-تىڭشىسى سەرگەي سكريپال مەن ونىڭ قىزى يۋليا سكريپالدىڭ ۋلانۋىنا بايلانىستى سالعان جاڭا سانكتسيالارى ءوز كۇشىنە ەنەدى. 

اقش مەملەكەتتىك دەپارتامەنتى فەدەرالدىق رەەستەرگە سانكتسيانى كۇشىنە ەنگزەتىنى جايلى ەسكەرتكەن.  8 تامىزدا جاريالانعان سانكتسياعا ساي، اقش ۇلتتىق قاۋىپسىزدىگى سالاسىمەن بايلانىستى تاۋارلار جانە رەسەيگە ازاماتتىق ماقساتتا قولدانىلاتىن ونىمدەردى، تەحنولوگيالاردى ەكسپورتتاۋعا تىيىم سالىنادى. بۇعان قوسا، رەسەيگە مۇناي-گاز سالاسىنا قاتىسى بار ەلەكترونيكا مەن قوسالقى قۇرىلعىلار جەتكىزۋگە شەكتەۋ قويىلماق.

ەستەرىڭىزگە سالا كەتەيىك، اقش-تاعى پرەزيدەنت سايلاۋىنا رەسەيدىڭ ارالاسقانى ءۇشىن كونگرەسكە جاڭا زاڭ جوباسى ەنگىزىلگەن بولاتىن. قۇجاتتا رەسەيدىڭ «سبەربانك»، «گازپرومبانك»، ۆتب، «ۆنەشەكونومبانك» سىندى ءىرى بانكتەرىنىڭ جۇمىس ىستەۋىنە تىيىم سالۋ قاراستىرىلعان. جاڭا زاڭ رەسەيدىڭ دەربەس قارىزىنا بايلانىستى ترانزاكتسياعا شەكتەۋ قويۋدى ماقسات ەتەدى. 2014 جىلى رەسەيدىڭ ۋكراينا شىعىسىنا جاساعان اگرەسسياسى مەن قىرىمدى اننەكسيالاعانى ءۇشىن ۆاشينگتون ماسكەۋگە سانكتسيا سالدى. سودان بەرى ەكى دەرجاۆا اراسىنداعى كيكىلجىڭنىڭ سالدارى اقش سالعان سانسىز سانكتسيالارعا ۇلاسىپ كەلەدى. سانكتسيالاردىڭ سالدارىنان رەسەي وليگارحتارى مەن كومپانيا باسشىلارى «قوڭىز تەرىپ كەتكەن» بولاتىن.

وسى ۋاقىتقا دەيىن ۆاشينگتون جاريالاعان سانكتسيالارعا بايلانىستى رۋبل قۇنىسىزدانىپ كەتكەن بولاتىن. اقش پرەزيدەنتى دونالد ترامپتىڭ پسەنىمدىلىگنە قاراعاندا، ەندى كەزەكتى سانكتسيا ەنگىزىلگەن كۇننەن باستاپ، رەسەيدىڭ جاعدايى ءتىپتى السىرەي تۇسپەك. دەمەك، ترامپ «دوسىڭ ورىس بولسا، ايبالتاڭ جانىڭدا ءجۇرسىن» – دەگەن ءتامسىلدى بەرىك ۇستاناتىن كورىنەدى. ال وزىنەن السىزدەرگە كۇش كورسەتۋدى ءجون سانايتىن ۆ.ءپۋتيننىڭ بۇل جولعى ارەكەتىن الداعى ۋاقىتتاردا كورە جاتارمىز.

"The Qazaq Times"