ءسۇريا مەن  يراكتان «يسلام مەملەكەتى» تەررورلىق ۇيىمىنىڭ قۇرامىندا بولعان 1 مىڭنان استام ورتالىق ازيا ەلدەرىنىڭ ازاماتتارى اۋعانستانعا قونىس اۋدارۋدا.

بىرىككەن ۇلتتار ۇيىمىنىڭ مالىمەتى بويىنشا، قازىرگى تاڭدا ءسۇريا مەن يراك اۋماعىندا «يسلام مەملەكەتى» تەررورلىق ۇيىمىنىڭ 30 مىڭعا جۋىق سودىرى قالعان. ولاردىڭ ىشىندە 1 مىڭنان استام ادام ورتالىق ازيا ەلدەرىنىڭ ازاماتتارى جانە ولار «يسلام مەملەكەتى» لاڭكەستىك ۇيىمىنىڭ جەڭىلىسىنەن كەيىن اۋعانستانعا قونىس اۋدارۋدا.

ەستەرىڭىزگە سالايىق، بۇعان دەيىن ءدال وسى بىرىككەن ۇلتتار ۇيىمى «اۋعانستاندا «يسلام مەملەكەتى» تەررورلىق ۇيىمىنىڭ قۇرامىندا بولعان 750-گە جۋىق ورتالىق ازيا ەلدەرىنىڭ ازاماتتارى بار» دەگەن اقپارات تاراتقان. «يسلام مەملەكەتى» لاڭكەستىك ۇيىمى ءسۇريا مەن يراكتا جەڭىلىس تاپقاننان كەيىن اۋعانستان اۋماعىندا وسى ۋاقىتقا دەيىن بەلسەندىلىك تانىتپاعان تەررورلىق توپتار قايتادان باس كوتەرە باستاعان.

“The Qazaq Times”