قىتاي يادرولىق وق تۇمسىق الىپ جۇرۋگە قاۋقارلى گيپەر دىبىستىق ۇشۋ اپپاراتىن سىناقتان وتكىزدى – دەپ حابارلايدى Global Times اقپارات اگەنتتىگى.

اگەنتتىك مالىمەتىنشە، قىتاي قارۋلى كۇشتەرى «Xingkong-2» ۇشۋ اپپاراتىن ەلدىڭ سولتۇستىك-باتىسىندا ورنالاسقان سىناق الاڭدارىنىڭ بىرىندە تاجىريبەدەن وتكىزگەن. سىناق بارىسىندا «Xingkong-2» زىمىراننان ءساتتى ءبولىنىپ شىعىپ، مەجەلەنگەن جەرگە ۋاقىتىندا قونعان.

قىتايدىڭ اەروعارىش جانە اەروديناميكا اكادەمياسى قۇراستىرۋشىلارىنىڭ سوزىنشە، «Xingkong-2» ۇشۋ اپپاراتى يادرولىق وق تۇمسىقتار الىپ جۇرۋگە جانە ءوزىنىڭ جىلدامدىعىنىڭ ارقاسىندا اۋە قورعانىس جۇيەلەرىن اينالىپ وتۋگە قاۋقارلى.

“The Qazaq Times”