ماسكەۋدە 2,5 مىڭ ادامنىڭ قاتىسۋىمەن شەرۋ ءوتتى – دەپ  حابارلايدى ينتەرفاكس اقپارات اگەنتتىگى.

اگەنتتىك مالىمەتىنشە، ماسكەۋ قالاسىنىڭ اكادەميك ساحاروۆ كوشەسىندە زەينەت جاسىن 63 جاستان 65 جاسقا ۇزارتۋعا قارسى شەرۋ وتكەن. قارسىلىق اكتسياسىنا «يابلوكو»، «دەموكراتيالىق قوزعالىس»، «اشىق رەسەي» پارتيالارىنىڭ وكىلدەردى مەن وپپوزيتسيالىق ساياساتكەر الەكسەي ناۆالنىيدىڭ جاقتاستارى قاتىسقان. بىرنەشە پارتيانىڭ باسىن قوسقان بۇل جولعى قارسىلىق اكتسياسىنا ماسكەۋ اكىمشىلىگى رۇقسات بەرگەن.

ەستەرىڭىزگە سالايىق، شىلدە ايىنىڭ 19-ى كۇنى مەملەكەتتىك دۋماعا زەينەت جاسىن 65 جانە 63 جاسقا ۇزارتۋعا بايلانىستى زاڭ جوباسى كەلىپ تۇسكەن. جوبا اۆتورلارى دەپۋتاتتاردان ەرلەردىڭ زەينەت جاسىن 63-تەن 65-كە، ال ايەلدەردىڭ زەينەت جاسىن 58-دەن 63-كە ۇزارتۋدى سۇراعان.

ايتا كەتەتىن ءبىر جايت، 2013 جىلى قازاقستاندا دا ايەلدەردىڭ زەينەت جاسىن 63-كە دەيىن ۇزارتۋ ۇسىنىلعان جانە سول كەزدەگى ەڭبەك جانە الەۋمەتتى قورعاۋ ءمينيسترى بولعان سەرىك ابدەنوۆ بۇكىل رەسپۋبليكاعا تانىمال ساياساتكەر اتانعان. ول قاراعاندى وبلىسىنا جاساعان ساپارىندا جەرگىلىكتى تۇرعىنداردىڭ «ايەلدەر نە سەبەپتى 63 جاستا زەينەتكە شىعۋى ءتيىس؟» دەگەن سۇراعىنا: «پوتومۋ چتو، پوتومۋ چتو» دەپ جاۋاپ بەرگەن. وسىدان باستاپ ابدەنوۆ مىرزا حالىق اراسىندا «مينيستر پوتومۋ چتو» اتاعىن العان جانە كوپ ۇزاماي وتستاۆكاعا كەتكەن. بىراق مينيستر كەتكەنىمەن حالىق تاراپىنان ۇلكەن قارسىلىققا تاپ بولعان زاڭ جوباسى كوپ ۇزاماي پارلامەنتكە قايتىپ ورالدى. بۇل جولعى زاڭ بويىشا 2018 جىلدىڭ 1 قاڭتارىنان باستاپ ايەلدەردىڭ زەينەت جاسى 2027 جىلعا دەيىن جىلىنا 6 ايدان ۇلعاياتىن بولادى. بۇل ۇلعايۋ 2027 جىلى 63 جاسقا كەلىپ بىراق توقتايدى. ءبىر سوزبەن ايتقاندا وسىدان بەس جىل بۇرىن «پوتومۋ چتو پوتومۋ چتو مينيستر» حالىققا تۇسىندىرە الماعان زاڭ جوباسى ءبارىبىر جۇزەگە اسىرىلۋدا.

“The Qazaq Times”