يران ەۋروپانى ەسىرتكى ساۋداسىنا جول بەرگەنى ءۇشىن ايىپتايدى

يران ىشكى ىستەر مينيسترلىگى تاراتقان مالىمەتكە قاراعاندا، ەۋروپادا ەسىرتكى ساۋداسىنىڭ قارجى اينالىمى 60 ميلليارد اقش دوللارىنا جەتكەن. وسى مالىمەتتى العا تارتا وتىرىپ، يران ىشكى ىستەر ءمينيسترى بىرقاتار ەلدەر مەن حالىقارالىق ۇيىمداردى ەسىرتكى ساتۋ، تاسىمالداۋعا قارسى كۇرەستە ءوز مىندەتىن اتقارا المادى دەپ ايىپتايدى. بۇل تۋرالى IRNA اقپاراتتىق اگەنتتىگى حابارلادى.

يران ءىىم باسشىسى راحماني فازلي سوزىندە: «كەيبىر ەلدەر قارجى جىلىستاتۋعا قارسى زاڭدى جۇزەگە اسىرىپ جاتىرمىز دەگەنىمەن، ەسىرتكى ساۋداسى ارقىلى جىلىستاتىلعان قارجىنى قالاي باسقارىپ وتىرعانىن اشىق ايتپايدى. ال يراندا بولسا 2017 جىلدىڭ وزىندە 2 مىڭ توننادان استام ەسىرتكى زاتتارى تاركىلەندى. بۇل قاۋىپسىزدىك كۇشتەرىنىڭ 2 مىڭنان استام رەت جۇرگىزگەن وپەراتسيالارىنىڭ ناتيجەسى»، – دەدى. فازلي بۇل كورسەتكىشتەر يران قاۋىپسىزدىك كۇشتەرىنىڭ ەسىرتكى ساۋداسىنا قارسى كۇرەستەگى تابىستى ناتيجەسىن ايعاقتايتىنىن العا تارتادى.

يران تارابى ءوزىن الەمدەگى ەسىرتكى ساۋداسى مەن ەسىرتكى بۇيىمدارىنىڭ كونترابانداسىمەن كۇرەستەگى كوشباسشى ەل دەپ سانايدى. مالىمەتتەرگە قاراعاندا، ەسىرتكىگە قارسى كۇرەستە يران قاۋىپسىزدىك كۇشتەرىنەن 3 مىڭنان استام قىزمەتكەر شەيت بولعان.

“The Qazaq Times”