قازاقستاندا ەسىرتكى ساتۋمەن اينالىسقان سايتتار بۇعاتتالدى

قازاقستان اۋماعىندا ەسىرتكى ساتۋمەن اينالىسقان بىرنەشە سايتتاردىڭ جۇمىسى توقتاتىلدى. بۇل تۋرالى كولىك پروكۋراتۋراسى حابارلادى.

ەسىرتكى ساتۋدى ەركىن تۇردە جارنامالاپ كەلگەن سايتتار قازاقستاننىڭ بارلىق اۋماعىندا تىركەلگەن بولىپ شىقتى. اقتوبە كولىك پروكۋراتۋراسى حابارلاعانداي، سوت شەشىمى بويىنشا بارلىق 14 سايتتىڭ قىزمەتى زاڭسىز دەپ تانىلدى. ەسىرتكى زاتتارىن ساتۋ مەن پايدالانۋدى ناسيحاتتايتىن الەۋمەتتىك جەلىلەردەگى پاراقشالارعا قولجەتىمدىلىكتى شەكتەلدى. سونىمەن قاتار، پسيحوتروپتىق زاتتاردى، ولاردىڭ انالوگتارى مەن پرەكۋرسورلارىن ساتۋدى جۇزەگە اسىرىلعان ينتەرنەت-سايتتار تولىعىمەن بۇعاتتالادى.

رەسمي دەرەكتەر بويىنشا، 2000 جىلى قازاقستاندا 34 مىڭ ناشاقور ارنايى تىركەۋدە بولعان، ال بۇۇ-نىڭ ناركوبيزنەسكە جانە قىلمىسقا قارسى كۇرەس باسقارماسىنىڭ مالىمەتى بويىنشا، سول جىلدارى قازاقستاندا 250 مىڭ ەسىرتكىگە تاۋەلدى ادام ءومىر سۇرگەن. 2008 جىلى باس پروكۋراتۋرانىڭ قۇقىقتىق ستاتيستيكا جانە الەۋمەتتىك ەسەپكە الۋ كوميتەتى 54 مىڭ دەسە، قازىر بۇل كورسەتكىش ەدۋىر ارتقان. سونىڭ ىشىندەگى 4 مىڭى ايەلدەر، بەس مىڭعا جۋىعى جاسوسپىرىمدەر ەكەن. ناركولوگتاردىڭ ايتۋىنشا، ەسىرتكىگە تاۋەلدى ناشاقورلاردىڭ ناقتى سانىن شىعارۋ ءۇشىن، رەسمي كورسەتكىشتەردى كەمىندە 5-6 ەسەگە كوبەيتكەن ءجون، سوندا قازاقستانداعى ناشاقورلاردىڭ ناقتى سانىنا جاقىنداۋعا بولادى دەيدى ولار. ال ەسىرتكى تاسىمالداۋعا ارنالعان «ەركىن سايتتار» ءبىراز ۋاقىت كولەمىندە قولجەتىمدى بوپ كەلگەن.

"The Qazaq Tımes"