پومپەو: يران ۇكىمەتى يراندىقتاردىڭ قورقىنىشتى تۇسىنە اينالدى

اقش-يران اراسىنداعى قايشىلىق كۇن ساناپ ۇدەي تۇسۋدە. ءبىر كۇنى بۇرىن قۇراما شتاتتىڭ مەملەكەتتىك حاتشىسى مايك پومپەو مالىمدەمە جاساپ: «يراننىڭ ۇكىمەتى الدەقاشان يران حالقىنىڭ قورقىنىشتى تۇسىنە اينالعان. الايدا، قۇراما شتات يران رەجيمىنە جوعارى دەڭگەيدەگى شابۋىل باعىتتاۋدان قورىقپايدى»، – دەدى. ول سونىمەن بىرگە، قۇراما شتاتتىڭ بارلىق وداقتاستارىن يراندى قارجىلاي قىسىمعا الۋعا شاقىرعان. بۇل تۋرال VOA جاڭالىقتار قىزمەتى حابارلادى.

مايك پومپەو اتالعان مالىمدەمەسىن جەكسەنبى كۇنى پرەزيدەنت رەيگان اتىنداعى مەملەكەتتىك كىتاپحانادا جاريا ەتكەن. ءارى سول ورتادا تەگى يراندىق اقش ازاماتتارى كوپ بولعان.

پومپەو سوزىندە يران رەجيمىنىڭ قالىپتاسقان جاعدايعا جاۋاپكەرشىلىك ەتپەيتىن، ارەكەت جاساۋعا قابلەتسىز السىزدىگىن سىنعا العان جانە ارانداتۋ مەن وزگە دە قيتۇرقى ارەكەتتەرىن جاۋاپسىز قالدىرمايمىز دەپ ەسكەرتتى. پوسپەو ءسوز اراسىندا يران رەجيمىن قاراقشىلىق جۇيەگە دە ۇقساتىپ وتكەن. «ير-نىڭ جوعارى بيلەۋشىلەرى حالىقتىڭ بايلىعىن سورىپ، ونىڭ ەسەسىنە تەرروريزمگە قولداۋ كورسەتتى. سونداي-اق، وزگە مەملەكەتتەرگە يسلام رەۆوليۋتسياسىنىڭ يدەياسىن تاراتۋعا تىرىستى»، – دەدى.

اقش مەملەكەتتىك حاتشىسىنىڭ ايتۋىنشا، يران ەكونوميكاسى قازىر «جوعارى تەمپەراتۋرادا» تۇر. قازىرگى ەكونوميكالىق تۇزىمنەن تەك جوعارى بيلەۋشىلەر عانا پايدا تابادى. پومپەو اياتوللا حومەيني باستاعان جوعارى جىكتەردىڭ ەلدەن جاسىرعان ميللياردتاعان دوللارعا تەڭ قارجىسى بولا تۇرا، يراندىقتاردىڭ ۇشتەن ءبىرى كەدەيلىكتە ءومىر ءسۇرىپ وتىرعانىن ايتتى. وسىمەن بىرگە، پومپەو يرانداعى ءسوز بوستاندىعىن دا اۋىر سىننىڭ استىنا العان.

اقش لاۋازىمدىسىنىڭ اتالعان مالىمدەمەسىنەن بەلگىلى بولعانداي، يران حالقىنىڭ ينتەرنەت تسەنزۋراسىنان قۇتىلۋ ءۇشىن اقش ۇكىمەتى يراندىقتارعا قولجەتىمدى ارنالاردى قۇرۋعا كومەكتەسەتىنىن انىق بولدى. دەگەنمەن، ونىڭ بۇل سوزدەرى يران ۇكىمەتىنىڭ شىمبايىنا باتاتىنى انىق. ول جانە ەكى ەل اراسىنداعى ارازدىقتى قاقتىعىسقا قاراي جاقىنداتا تۇسپەك.

“The Qazaq Times”