(جالعاسى. باسى مىنا سىلتەمەدە)

ءپۋتيندى ءبىر كورسەم ارمانىم جوق

وسىمەن قىزىلجارداعى الەم قازاق جاستارىنىڭ فۋتبولى تۋرالى اڭگىمە ءتامام. ەندى مۇلدەم، باسقا كەپ، مۇلدەم باسقا اڭگىمە ايتۋعا تۋرا كەلىپ وتىر.

قىزىلجاردان تاڭ اتا تاكسيگە ءمىنىپ، كوكشەتاۋ قالاسىنا بەت الدىم. كوكشەتاۋ - گەورافيالىق تۇرعىدا سولتۇستىكتە ورنالاسقانىمەن، اقمولا وبلىسىنا قاراستى قالا. ميداي جازىق دالانىڭ قاق ورتاسىندا قۇداي-تاعالا اسپاننان تاستاي سالعانداي ايگىلى كوكشەسى تۇر، تۇمسىعىن كوككە ءشۇيىرىپ. توسىنە كوزدىڭ تامشىسىنداي سەكسەن كولدى سىيدىرعان سول سۇلۋ ولكەنىڭ ماڭىندا (شامامەن ەكى ءجۇز شاقىرىم قاشىقتىقتا) قازاق اسا ءبىر ماڭىز بەرىپ، نازار اۋدارا قويمايتىن توماعا-تۇيىق اتباسار دەگەن قالا بار. سول قالاعا بارىپ، ءبىر كۇدىكتى جايدى انىقتاپ قايتۋ كەرەك بولدى.

ءبىز قىزىلجارداعى جەرگىلىكتى حالىقپەن سويلەسىپ، ەل مەن جەر تۋرالى اڭگىمە سۇراستىرا باستاعاندا تالاي قىزىقتى جايتتارعا تاپ بولدىق. ونىڭ ءبارىن ايتىپ، ۋاقىت الۋدىڭ قاجەتى جوق شىعار. سوندا دا ءبىرىن تىلگە تيەك ەتە كەتەيىن.

بىزگە گيد بولعان قىزدىڭ ارمانى - ومىردە ءپۋتيندى تىرىدەي كورۋ ەكەن. نەگە دەسەك، "ەرىكتى بولىپ ءجۇرىپ، نازارباەۆتى ءدال قاسىنان كوردىم، ەندى ءپۋتيننىڭ پەتروپاۆلعا كەلۋىن كۇتىپ ءجۇرمىن" دەيدى.

وزگە ەلدىڭ پرەزيدەنتىنە دەگەن ەسسىز ىنتىقتىق نەنىڭ بەلگىسى؟ ارينە، يدەولوگيادا اقاۋ بار دەگەن ءسوز.

ءبىر ولقىلىقتى ايتقان سوڭ، جاقسىلىقتى دا ۇمىتپاعان ءجون. قىزىلجارداعى ءار دۇكەندە العان زاتىڭا سول مەزەتتە چەك ۇرىلىپ جاتادى ەكەن. الماتىنىڭ وزىندە ءدال مۇنداي زاڭدىلىقتى، جاۋاپكەرشىلىكتى كورە بەرمەيمىز.

تىزگىن تارتۋ

قوش! تىزگىندى بوس قويا بەرسەك، قىزىلجارداعى ابىلايدىڭ رەزيدەنتسياسى، ولكەتانۋ مۇراجايى، كىتاپحانا مەن مەكتەپتەر تۋرالى ۇزاق تولعاۋعا تۋرا كەلەدى. ابىلايدىڭ اعاش ءۇيىنىڭ تاريحى، بۇقار جىراۋدىڭ قولجازباسى، ماعجاننىڭ جاينامازى تۋرالى جەكە-جەكە ماقالا جازۋعا بولار ەدى. بىزدەن كەيىن دە قىزىلجارعا باراتىندارعا بىردەمە قالسىن دەپ، و تاقىرىپتاردى قاۋزاماي-اق قويۋدى دۇرىس كورىپ وتىرمىز.

جولاي قىزىلجاردان قايتقان قازاق جاستارىنىڭ ءان شىعارعانى تۋرالى حابار جەتتى.

تىڭداپ وتىرىپ، جان-دۇنيەم بورداي ەزىلىپ سالا بەردى.

"قيماي بارامىن،

ميداي دالانىڭ

توسىنە اتتەڭ،

سىيماي بارامىن!"...

جىگىتتەر قىزىلجاردى عانا قيماي بارا جاتقان شىعار! مەن مىنا اقپاراتتان كەيىن ءوز كەۋدەمە ءوزىم سىيماي بارا جاتتىم.

(ماتەريال اۆتوردىڭ وتىنىشىمەن ىقشامدالدى)

 

قانات بىرلىكۇلى

الماتى - استانا - قىزىلجار - استانا - الماتى

Abai.kz

 

“The Qazaq Times”