كحدر اقش-قا دوق كورسەتتى: «كەلىسسوز نەمەسە يادرولىق تەكەتىرەس»

الدىن الا جاسالعان كەلىسىم بويىنشا، اقش پرەزيدەنتى دونالد ترامپ پەن كحدر باسشىسى كيم جوڭ ىن 12 ماۋسىمدا سينگاپۋردە كەزدەسپەكشى بولعان. الايدا، وسى تاريحي كەزدەسۋ بەلگىلەنگەننەن بەرى ەكى ەل باسشىلارىنىڭ كەزدەسۋلەرىنە قاتىستى تارتىس تولاستاماي تۇر.

بۇعان دەيىن كحدر، ەگەر اقش «زاڭسىز ءارى ورەسكەل ارەكەتتەرىن» توقتاتپاسا، وسى كەزدەسۋگە بايلانىستى شەشىمىن ءالى قاراستىراتىنىن مالىمدەگەن ەدى. بۇل تۋرالى بۇگىن تاعى كحدر-دىڭ سىرتقى ىستەر ءمينيسترىنىڭ ورىنباسارى چيو سون حي دە مالىمدەمە جاسادى.

«اقش پرەزيدەنتى كحدر باسشىسى كيم جوڭ ىنمەن كەزدەسە مە، الدە بىزبەن يادرولىق تەكەتىرەستە قاقتىعىسا ما — بۇنىڭ بارلىعى اقش پرەزيدەنتىنىڭ شەشىمى مەن ارەكەتىنە بايلانىستى»، - دەدى ول.

ەسكە سالايىق، سولتۇستىك كورەيا وڭتۇستىك كورەيامەن 16 مامىرعا جوسپارلانعان كەزدەسۋدەن باس تارتقان ەدى. وعان سەبەپ — اقش پەن وڭتۇcتىك كورەيانىڭ اسكەري جوسپارلارى مەن ارەكەتتەرى ەدى. كەيىننەن، كحدر باسشىلىعى وسى سەبەپكە بايلانىستى كيم جوڭ ىن مەن دونالد ترامپتىڭ كەزدەسۋى دە بولماۋى مۇمكىن دەگەن ەدى.

“The Qazaq Times”