1 اقپان كۇنى نيدەرلاند سىرتقى ىستەر مينيسترلىگىندە «ەكسپو-2017» حالىقارالىق مامانداندىرىلعان كورمەسىنە قاتىساتىن گوللاندىقتارعا ارنالعان رەسمي سايتتىڭ تۇساۋكەسەرى وتكىزىلدى. ينتەرنەت-قۇرال نيدەرلاندتىڭ ساۋدا جانە ينۆەستيتسيالار ۇلتتىق اگەنتتىگىنىڭ ەلەكتروندى پورتالى نەگىزىندە قۇرىلدى. بۇل تۋرالى ءسىم-ءنىڭ رەسمي سايتىندا حابارلاندى.

سايتتا العاش رەت نيدەرلاندتىڭ بالامالى ەنەرگەتيكا سالاسىندا جەتەكشى تەحنولوگيالار مەن يننوۆاتسياداعى جەتىستىكتەرىن بەينەلەيتىن «ەكسپو-2017» لوگوتيپى جانە «Low Land, High Energy» ۇرانى جاريا ەتىلدى.

ينتەرنەت قولدانۋشىلارعا «ەكسپو-2017» كورمەسىندەگى نيدەرلاندتىڭ ۇلتتىق پاۆيلونى تۋرالى اقپارات، كورمەگە قاتىسۋشىلار مەن قوناقتارعا ەلەكتروندىق تۇردە تاپسىرىس بەرۋ مۇمكىندىگى قاراستىرىلعان ءىس-شارالار باعدارلاماسى جانە قازاقستانداعى پايدالى سىلتەمەلەر ۇسىنىلعان.

«قازاقستاندا بيزنەس جۇرگىزۋ» بولىمىندە استانادا وتەتىن كورمە گوللاند بيزنەس-وكىلدەرىنە، بالامالى ەنەرگەتيكا، اۋىل شارۋاشىلىعى، جاسىل تەحنولگيالار مەن يننوۆاتسيا سالالارىندا ىسكەرلىك بايلانىستاردى كەڭىنەن ورناتۋعا مۇمكىندىك بەرەتىنى ايرىقشا بەلگىلەنگەن. وعان قوسا، سايتتا 2017 ج. ماۋسىم-قىركۇيەك ارالىعىندا وتەتىن ساۋدا ميسسيالارى تۋرالى اقپاراتتى ورنالاستىرۋ جوسپارلانعان.

ەرەكشە نازار «بولاشاق جاڭاشىلدار بۋىنى» رەتىندە ستۋدەنتتەرمەن جۇمىسقا اۋدارىلماق. استاناداعى «ەكسپو-2017» كورمەسىندە نيدەرلاند دەلەگاتسياسى گوللاند جانە قازاقستاندىق ستۋدەنتتەر اراسىنداعى بىلىممەن الماسۋعا باعىتتالعان «Innovation Challenge» اكتسياسىن ۇيىمداستىرۋدى جوسپارلاۋدا.

رەسمي سايتتىڭ اشىلۋى قارساڭىندا قازاقستاننىڭ نيدەرلاندتاعى ەلشىسى ماعجان ءىلياسوۆتىڭ نيدەرلاندتىڭ ەكسپو-داعى ۇلتتىق كوميسسارى حانس دريسسەرمەن كەزدەسۋى ورىن الدى. كەلىسسوزدەر اياسىندا تاراپتار نيدەرلاندتىڭ استاناداعى حالىقارالىق كورمەگە دايىندىق بارىسى سۇراقتارى، سونداي-اق 2017 ج. 22-23 اقپاندا استانادا وتەتىن ەكسپو كورمەسىنىڭ حالىقارالىق كوميسسارلارى جينالىسىنا جوسپارلانعان گوللاند دەلەگاتسياسىنىڭ ساپارى ماسەلەلەرى تالقىلاندى.

«ەكسپو-2017» ارنالعان ارنايى سايتتىڭ نيدەرلاندىدا اشىلۋى - استانادا وتەتىن كورمەگە قاتىسۋشىلار مەن قوناقتاردى كەڭىنەن تارتۋدا ءتيىمدى قۇرال بولاتىنى بەلگىلەنىپ ءوتتى. سايتتى كەلەسى سىلتەمە ارقىلى اشۋعا بولادى www.hollandtradeandinvest.com/events/contents/expo-astana-2017

“The Qazaq Times”