فوتو: KP.UA

رەسەيدە لاتۆيا ەلشىلىگىنە شابۋىل جاسالدى – دەپ حابارلايدى كوررەسپوندەنت ينتەرنەت باسىلىمى.

مامىر ايىنىڭ 9-ى كۇنى لاتۆيا سىرتقى ىستەر ءمينيسترى ەدگار رينكەۆيچ اتالمىش جاعدايعا بايلانىستى ءوزىنىڭ Twitter پاراقشاسىنا: «ماسكەۋ قالاسىنداعى لاتۆيا ەلشىلىگىنە شابۋىل جاسالدى. لاتۆيا رەسەي سىرتقى ىستەر مينيسترلىگىنە ديپلوماتيالىق وكىلدىكتەر قاۋىپسىزدىگىن ءتيىستى دەڭگەيدە قامتاماسىز ەتۋدى تالاپ ەتىپ، قارسىلىق نوتاسىن جولدايدى. رەسەي بيلىگى مۇنداي ارانداتۋشى ارەكەتتەرگە جول بەرمەۋى ءتيىس» - دەپ جازعان.

"ريا نوۆوستي" اقپارات اگەنتتىگىنىڭ مالىمەتىنشە، لاتۆيا ەلشىلىگىنە تىركەۋدەن وتپەگەن «وزگە رەسەي» پارتياسىنىڭ بەلسەندىلەرى شابۋىل جاساعان. ولار وزدەرىنىڭ بۇل ارەكەتىن "لاتۆيادا ازاماتتىق بەلسەندى ۆلاديمير ليدەرماننىڭ قاماۋعا الىنۋىنا قارسىلىق" - دەپ ءتۇسىندىردى. ليبەرمان لاتۆيا بيلىگىنەن ورىس مەكتەپتەرىن قايتا قالپىنا كەلتىرۋدى تالاپ ەتىپ، ءتۇرلى باستامالار كوتەرگەن.

“The Qazaq Times”