قيىر شىعىس جانە پۋتين. فوتو: Daily Express

1 اقپاننان تارتىپ، كەز-كەلگەن رەسەيلىك ازاماتقا رەسەيدىڭ قيىر شىعىسىنان 1 گەكتار جەر تەگىن الۋ قۇقىعى بەرىلدى. رەسەي پرەزيدەنتى ۆلاديمير پۋتين، وتكەن جىلى 2 مامىردا «قيىر شىعىستان ءبىر گەكتار جەر» زاڭىنا قول قويعان بولاتىن. بۇل زاڭ قيىر شىعىستى دامىتۋ ءۇشىن، رەسەيلىكتەردى سول وڭىرگە قونىستاندىرۋ ماقساتىندا جاسالعان. قول قويىلعان قۇجات 2016 جىلدىڭ  1 ماۋسىمىنان باستاپ رەسمي كۇشىنە ەنگەن.  بۇل تۋرالى World.Xinhua حابارلايدى.

زاڭدى ءۇش كەزەڭگە ءبولىپ جۇزەگە اسىرۋ جوسپارلانعان بولاتىن: العاشقى كەزەڭىندە 2016 جىلدىڭ 1 ماۋسىمىنان باستاپ، قيىر شىعىس فەدەرالدىق وكرۋگىنىڭ ءاربىر اۋدان، اۋىل تۇرعىندارىنا اتالعان وكرۋگتەن 1 گەكتارعا دەيىن تەگىن جەر بەرىلدى. ەكىنشى كەزەڭىندە، 2016 جىلدىڭ 1 قازانىنان باستاپ، وكرۋگتەگى كەز-كەلگەن ازاماتقا ءبىر گەكتار جەردەن تەگىن يگىلىكتەنۋ قۇقىعى بەرىلگەن. ال، ءۇشىنشى كەزەڭ، 2017 جىلدىڭ 1 اقپانىنان تارتىپ، بارلىق رەسەيلىكتەردىڭ قيىر شىعىستان ءبىر گەكتار جەر الۋ قۇقىعى بولادى. ياعني، كۇنى كەشەدەن تارتىپ اربىر  رەسەيلىكتىڭ قيىر شىعىستان جەرگە يەلىك ەتۋ قۇقى بار.

كۇشىنە ەنگەن زاڭ بويىنشا، ءبىر گەكتارعا دەيىنگى جەردى 5 جىلعا سالىقسىز تەگىن پايدالانۋىنا ەرىكتى. يەلىك ەتكەن جەرىن تۇرعىن ءۇي، اۋىل شارۋاشىلىعى، تۋريزم نەمەسە باسقا دا ماقساتتارعا پايدالانۋىنا بولادى. ەگەر، بەلگىلەنگەن مەرزىم ىشىندە جەردى پايدالانىپ، كادەگە جاراتا السا، جەر پايدالانۋ قۇقىعى جالعاستى كۇشىنە يە بولماق. زاڭ بويىنشا بۇل يگىلىك تەك رەسەي فەدەراتسياسىنىڭ ازاماتتارىنا عانا قولجەتىمدى.

رەسەيدىڭ قيىر شىعىسى. فوتو: maps.google.com

رەسەيدىڭ قيىر شىعىسىنىڭ جالپى اۋماعى 6,17 ملن شارشى كيلومەتر بولىپ، تۇتاس رەسەي تەرريتورياسىنىڭ 36 پايىزىن يەلەيدى. وندا قونىستانعان 6 ملن شاماسىنداعى حالىق سانى، رەسەي حالىق سانىنىڭ 5 پايزىن عانا ۇستايدى.

جوعارىدا ايتقانىمىزداي اتالمىش زاڭ قيىر شىعىستى دامىتۋ ءۇشىن جاسالىپ وتىر. وعان قوسا، قىتايلىقتاردىڭ كاسىپورىندار ارقىلى قيىر شىعىستى يەمدەنۋىنەن ساقتانۋ ءۇشىن دە كەرەك بولعان بولۋى مۇمكىن. الايدا وسى ەلدە سوڭعى جىلدارداعى ەكونوميكالىق داعدارىستاردان جۇمىسسىزدار سانى ارتىپ، جۇمىس ىزدەپ قالاعا قونىس اۋدارعان حالىق سانى كوبەيگەن. سول ءۇشىن دە رەسەيلىكتەردىڭ ءبىر گەكتارعا دەيىنگى تەگىن جەر ءۇشىن قيىر شىعىسقا قونىس اۋدارا قويۋى نەعايبىل. اقش پەن ەۋروپانىڭ رەسەيگە دەگەن قاباعى جازىلىپ، سانكتسيالار الىنىپ تاستالسا، ەكونوميكاسى ولار ويلعانداي جاندانىپ جاتسا عانا، تۋريزم مەن اۋىلشارۋاشىلىعى ءۇشىن قيىر شىعىسقا قونىس اۋدارۋعا ىنتالى رەسەيلىكتەر كوبەيەر. دەموگرافيالىق تۇراقتىلىق ءۇشىن اۋىلدى جەرلەردى جۇمىسپەن قامتۋ شارالارى – قازىر، رەسەيلىك ۇكىمەتتى ابىگەرگە سالعان ماسەلەنىڭ ءبىرى.

«The Qazaq Times»