فوتو: Sputnik كىرگىزستان

شاۆكات ميرزيەەۆ «وزبەكستان تاپي گاز قۇبىرىنىڭ قۇرىلىسىنا قاتىسادى» – دەپ مالىمدەدى.

ءساۋىر ايىنىڭ 23-ءى كۇنى تۇركىمەنستان پرەزيدەنتى قۇربانعۇلى بەردىمۇحامەدوۆتىڭ تاشكەنتكە جاساعان رەسمي ءىس-ساپارى بارىسىندا وزبەكستان باسشىسى شاۆكات ميرزيەەۆ تاپي گاز قۇبىرىنىڭ قۇرىلىسى جونىندە مالىمدەمە جاسادى. وندا ول: «وزبەكستان تاپي گاز قۇبىرىنىڭ قۇرىلىسىنا قاتىسادى. ءبىز بۇل جوبادان كوزقاراستارىمىز تۇيىسەتىن جەردى تابامىز. تاپي اۋعانستانداعى جاعدايدى تۇراقتاندىراتىن كەڭ كولەمدەگى جوبا» - دەگەن.

ەستەرىڭىزگە سالايىق، قۇربانعۇلى بەردىمۇحامەدوۆتىڭ تاشكەنتكە جاساعان ساپارىنا دەيىن وزبەكستان بيلىگى تۇركىمەنستان-اۋعانستان-پاكىستان-ءۇندىستان باعىتىنداعى تاپي جوباسىنا قاتىسۋدان باس تارتىپ كەلگەن. تاپي گاز قۇبىرى جوباسىنىڭ قۇرىلىسى تۇركىمەنستان اۋماعىندا 2015 جىلدىڭ 13 جەلتوقسان كۇنى باستالعان. جوسپار بويىنشا، گاز قۇبىرى 2019 جىلى پايدالانۋعا بەرىلۋى ءتيىس.

“The Qazaq Times”