قىرعىزستان ۇكىمەتى وتستاۆكاعا كەتتى

قىرعىزستان ۇكىمەتى وتستاۆكاعا كەتتى – دەپ حابارلايدى اكيpress اقپارات اگەنتتىگى.

ءساۋىر ايىنىڭ 19-ى كۇنى قىرعىزستان پرەزيدەنتى سوورونباي جەەنبەكوۆ جوعارعى كەڭەس وتىنىشىنە سايكەس ەل ۇكىمەتىن وتستاۆكاعا جىبەرۋ حاقىنداعى قۇجاتقا قول قويدى. قىرعىز پرەزيدەنت اكىمشىلىگىنىڭ ءباسپاسوز قىزمەتى تاراتقان مالىمەت بويىنشا، جەەنبەكوۆ ەل كونستيتۋتسياسىنىڭ 85 بابىنىڭ 6 تارماعى جانە 1 بابىنىڭ 5 تارماعىنا سايكەس ۇكىمەتتى وتستاۆكاعا جىبەرگەن. قۇجات پرەزيدەنت قول قويعان ۋاقىتتان باستاپ كۇشىنە ەنگەن.

الدىنا الا بولجامدار بويىنشا، پرەمەر-مينيستر ساپار يساكوۆتىڭ ورنىنا پرەزيدەنت اكىمشىلىگىنىڭ باسشىسى مۇحاممەدكالى ابىلعاليەۆ كەلۋى مۇمكىن. ال مينيسترلەر كابينەتىمەن بىرگە وتستاۆكاعا كەتكەن قازىرگى پرەمەر ساپار يساكوۆتىڭ قانداي قىزمەتكە تاعايىندالاتىنى ازىرگە بەلگىسىز.

ساپار يساكوۆ قىرعىزستان پرەمەر-ءمينيسترى بولىپ 2017 جىلى 26 تامىز كۇنى سول كەزدەگى پرەزيدەنت المازبەك اتامباەۆتىڭ جارلىعى بويىنعا تاعايىندالعان. ول تاۋەلسىز قىرعىزستان تاريحىنداعى 29 پرەمەر بولعان.

ايتا كەتەتىن ءبىر جايت، ناۋرىز ايىندا بيلىك باسىنداعى سوتسيال-دەموكراتيالىق پارتيا توراعاسى بولىپ المازبەك اتامباەۆ قايتا سايلانعان.  وسىدان كەيىن ساراپشىلار ەكس-پرەزيدەنتتىڭ ۇلكەن ساياساتقا قايتىپ ورالۋىنا «جەەنبەكوۆ پەن اتامباەۆ اراسىندا بيلىك ءۇشىن تالاس باستالدى» - دەگەن باعا بەرگەن.

“The Qazaq Times”