تايۋان قىتاي مەن اقش اراسىنداعى شاحمات پەشكاسى ما؟

اقش پرەزيدەنتى دونالد ترامپ «تايۋانعا (تايۆان) ساياحات تۋرالى زاڭعا» قول قويعاننان كەيىن، مەملەكەتتىك حاتشىنىڭ ەكى كومەكشىسى جانە كوپتەگەن كونگرەسس مۇشەلەرى تايۋانعا رەسمي ساپارمەن بارىپ، اقش-تايۋان قاتىناسىن جوعارى دەڭگەيگە كوتەرگەن بولاتىن. الايدا، اقش پەن قىتاي اراسىنداعى ساۋدا جانە سىرتقى ساياساتتاعى شيەلەنىستەردىڭ ارتۋىمەن، تايۋان ماسەلەسى ۋاشينگتون مەن بەيجىڭ اراسىندا تىم سەزىمتال تاقىرىپ بولىپ وزگەردى. ءتىپتى كەيبىر تاراپتار تايۋان ەكى ەل اراسىنداعى شاحماتتىڭ پەشكاسىنا اينالىپ قالدى ما دەپ الاڭدايدى. بۇل تۋرالى «VOA» اقپاراتتىق سايتى جازدى.

الايدا، بۇل الاڭداۋشىلىق تۋراسىندا تايۋان پرەزيدەنتى ساي يىڭۆىن سەيسەنبى كۇنى سول ەلدەگى «Nian Dai» ارناسىندا ءوز پىكىرىن ءبىلدىردى. ول اتالعان ارنانىڭ باعدارلاماسىندا شەتەلدىك جاستارمەن كەزدەسىپ، ولاردىڭ الاڭداۋشىلىعىن تەرىسكە شىعاردى. تايۋان باسشىسى سوزىندە: «تايۋاندى تومەن باعالاماڭىز، تايۋان ءوزى دە ءبىر شاحماتشى. سىرتقى ساياسي بولمىستار كۇرت وزگەرگەن قازىرگى جاعدايدا، تايۋان بارلىق جاعدايدى مەڭگەرۋى كەرەك. بۇل «گومەوپاتيالىق وپەراتسيا» دەۋگە بولادى»، – دەدى.

ساي يىڭۆىن سوزىندە: «تايۋاننىڭ 23 ملن حالقى بار، بۇل از مولشەردەگى حالىق سانى ەمەس. ال، تايۋاننىڭ ەكونوميكالىق قۋاتى، ءتىپتى اسكەري قۋاتى دا بەلگىلى ءبىر دەڭگەيدە. شىن مانىندە تايۋاننىڭ ءوزى دە ايتارلىقتاي كۇش-قۋاتقا يە. كوپتەگەن ادامدار ءبىزدى باسقالار شاحمات تاسى رەتىندە ءسوز قىلادى. بىراق، ءسىز ۇمىتپاڭىز، تايۋان ءوزى دە ءبىر شاحمات ويىنشىسى»، – دەدى.

دەگەنمەن، تايۋان باسشىسى قازىرگى سىرتقى جاعدايلاردىڭ كۇردەلى وزگەرىستەرگە تۇسكەنىن، تايۋاننىڭ جەكە كۇش قۋاتى جاعىنان بۇعان قارسى تۇرۋدىڭ قيىن ەكەنىن انىق مويىندايدى. ول بۇنى تايۋاننىڭ ۇلتتىق قورعانىسى ءۇشىن ۇلكەن سىناق دەپ باعالادى.

تايۋان تاقىرىبى بەيجىڭ بيلىگىنىڭ ىشكى-سىرتقى ساياساتىنداعى ەڭ سەزىمتال تاقىرىپتاردىڭ ءبىرى. وسىدان بۇرىن قىتاي باسشىسى شي جينپيڭ تايۋاننىڭ دەربەستىككە ۇمتىلىپ جاتقانىن قاتاڭ سىنعا العان بولاتىن. ول جانە قىتايدىڭ قازىرگى قۋات-كۇشىن ايتا كەلىپ، قحر تۇتاستىعىن بىزدەن ەشكىم بۇزىپ اكەتە المايدى دەپ ەسكەرتكەن. سوڭعى اقش پەن قىتاي اراسىنداعى قايشىلىقتاردىڭ ارتا ءتۇسۋى تايۋان ماسەلەسىن كۇردەلىلەندىرە ءتۇستى.

 “The Qazaq Times”