فوتو: China.org

قىرعىزستاننىڭ ەكس-پرەزيدەنتى المازبەك اتامباەۆ قىتاي باسشىسى شي جينپيڭمەن كەزدەستى.

قىرعىزستان سوتسيال-دەموكراتيالىق پارتياسىنىڭ ءباسپاسوز قىزمەتى تاراتقان مالىمەت بويىنشا، ءساۋىر ايىنىڭ 11-ءى كۇنى المازبەك اتامباەۆ قىتايدىڭ بواو قالاسىندا شي جينپيڭمەن كەزدەسكەن. كەزدەسۋ بارىسىندا ەكى ەل باسشىلارى «ءبىر بەلدەۋ – ءبىر جول» جوباسى اياسىندا ەكى جاقتىق قارىم-قاتىناستىڭ دامۋ قارقىنى جونىندە اڭگىمەلەسكەن. بۇدان بولەك شي جيڭپيڭ المازبەك اتامباەۆتى قىرعىزستان سوتسيال-دەموكراتيالىق پارتياسىنىڭ توراعاسى بولىپ سايلانۋىمەن قۇتتىقتاپ، ەكى ەل اراسىندا دوستىق قارىم-قاتىناس ورناتۋعا ۇلەس قوسقانى ءۇشىن العىس بىلدىرگەن. ال ءوز كەزەگىندە المازبەك اتامباەۆ شي جينپيڭگە «بواو ورتالىق ازيا» فورۋمىنا شاقىرعانى ءۇشىن العىس ايتقان.

ەستەرىڭىزگە سالايىق، ناۋرىز ايىنىڭ 31-ءى كۇنى وتكەن قىرعىزستان سوتسيال-دەموكراتيالىق پارتياسىنىڭ قۇرىلتايىندا المازبەك اتامباەۆ پارتيا توراعاسى بولىپ سايلانعان جانە قۇرىلتايدان كەيىن وتكىزگەن ءباسپاسوز ءماسليحاتىندا پرەزيدەنت سوورونباي جەەنبەكوۆتى قاتاڭ سىنعا العان. وسىدان كەيىن كوپتەگەن ساراپشىلار "اتامباەۆ پەن جەەنبەكوۆ اراسىندا بيلىك ءۇشىن تالاس ءجۇرىپ جاتىر" - دەگەن بولجام ايتقان. ال بۇدان ءسال ەرتەرەكتە باق بەتتەرىندە قىتاي بيلىگىنىڭ قىرعىزستان سوتسيال-دەموكراتيالىق پارتياسىنا 1 ميلليون سوم كولەمىندە قارجى بەرگەندىگى جونىندە اقپارات تاراعان.

“The Qazaq Times”