وزبەكستان جانە قىرعىزستان پرەمەر-مينيسترلەرى قىرعىز رەسپۋبليكاسى ازاماتىنىڭ ولىمىنە الىپ كەلگەن وزبەك-قىرعىز شەكاراسىندا بولعان وقيعانى تالقىلادى.

وزبەكستان ۇكىمەتىنىڭ ءباسپاسوز قىزمەتى تاراتقان اقپارات بويىنشا، وزبەكستان پرەمەر-ءمينيسترى ابدۋللا اريپوۆ 8 ءساۋىر كۇنى قىرعىزستاندىق ارىپتەسى ساپار يساكوۆپەن تەلەفون ارقىلى سويلەسكەن. اڭگىمە بارىسىندا ۇكىمەت باسشىلارى ءساۋىر ايىنىڭ 7-ءى كۇنى قىرعىز رەسپۋبليكاسىنىڭ 1984 جىلى دۇنيەگە كەلگەن م.ف.م ەسىمدى ازاماتىنىڭ ولىمىنە الىپ كەلگەن وزبەك-قىرعىز شەكاراسىندا بولعان وقيعانى تالقىلادى. ناتيجەسىندە قوس تاراپ 9 ءساۋىر كۇنى  شەكارا قىزمەتى باسشىلارى دەڭگەيىندە كەزدەسۋ ۇيىمداستىرۋعا ۋاعدالاسقان.

ەستەرىڭىزگە سالايىق، ءساۋىر ايىنىڭ 7-ءى كۇنى قىرعىزستاننىڭ جالال-اباد وبلىسىنا قاراستى اكسى اۋدانىندا وزبەكستاندىق شەكاراشىلار 34 جاستاعى قىرعىزستان ازاماتىنا وق اتقان. سالدارىنان م.ف.م ەسىمدى ازامات جەرگىلىكتى اۋرۋحانالاردىڭ بىرىندە كوز جۇمعان.

“The Qazaq Times”