Өзбекстан және Қырғызстан премьер-министрлері Қырғыз Республикасы азаматының өліміне алып келген өзбек-қырғыз шекарасында болған оқиғаны талқылады.

Өзбекстан үкіметінің баспасөз қызметі таратқан ақпарат бойынша, Өзбекстан премьер-министрі Абдулла Арипов 8 сәуір күні қырғызстандық әріптесі Сапар Исаковпен телефон арқылы сөйлескен. Әңгіме барысында үкімет басшылары сәуір айының 7-і күні Қырғыз Республикасының 1984 жылы дүниеге келген М.Ф.М есімді азаматының өліміне алып келген өзбек-қырғыз шекарасында болған оқиғаны талқылады. Нәтижесінде қос тарап 9 сәуір күні  шекара қызметі басшылары деңгейінде кездесу ұйымдастыруға уағдаласқан.

Естеріңізге салайық, сәуір айының 7-і күні Қырғызстанның Жалал-Абад облысына қарасты Аксы ауданында өзбекстандық шекарашылар 34 жастағы Қырғызстан азаматына оқ атқан. Салдарынан М.Ф.М есімді азамат жергілікті ауруханалардың бірінде көз жұмған.

“The Qazaq Times”