الەمنىڭ ەڭ قاۋىپسىز قالاسىندا قاستاندىقپەن كىسى ءولتىرۋ ىستەرى كوبەيىپ كەتكەن

لوندون قالاسىنىڭ پوليتسيا تاراۋلارى حابارلاما تاراتىپ، قالاداعى اۋىر قىلمىس سانىنىڭ كۇرت ارتقانى تۋرالى مالىمدەدى. سوڭعى ەكى ايدا انگليانىڭ باس قالاسىندا قاستاندىق ىستەرى مەن ادام ءولىمى كوبىرەك تىركەلگەن. بۇل كورسەتكىش بويىنشا لوندون قالاسى العاش رەت نيۋ-يورك قالاسىنان اسىپ ءتۇستى. ۇلىبريتانيانىڭ ۇكىمەتى اتالعان ماسەلەگە ۇلكەن الاڭداۋشىلىق ءبىلدىرىپ وتىر. BBC اگەنتتىگى حابارلادى.

ۇستىمىزدەگى جىلدىڭ باس شەنىندە لوندوندا 46 ادامنىڭ ومىرىنە قاستاندىق جاسالعان. وسىمەن ءبىر مەزگىلدە اقش-تىڭ نيۋ-يورك قالاسىندا بۇل كورسەتكىش 50 ادامدى قۇراعان. الايدا، اقپان مەن ناۋرىز ايلارىندا لوندون قالاسىندا اۋىر قىلمىستىق ىستەر كوبەيە تۇسكەن. نيۋ-يوركتە بۇل  ەكى ايدا 32 ادام باسقالار جاعىنان ولتىرىلگەن بولسا، لوندوندا 37 ادامنىڭ ومىرىنە قول سالىنعان ەكەن.

بريتانيا مەن اقش-تىڭ بۇل ەكى قالاسىن سالىستىرۋداعى سەبەپ، ەكى شاھاردىڭ دا تۇرعىندار سانى قارايلاس – لوندوندا شامامەن 8,8 ملن ادام، نيۋ-يوركتە 8,6 ادام. اۋىر قىلمىس وتكىزۋ كورسەتكىشى بويىنشا وسىعان دەيىن نيۋ-يورك الدىنعى ورىندا بولىپ كەلگەن. لوندوننىڭ قاۋىپسىزدىك تاراۋلارىنىڭ مالىمدەۋىنشە، قاستاندىقپەن كىسى ءولتىرۋدىڭ باسىم كوبى پىشاقپەن جاسالعان شابۋىلداردان بولعان. بىراق، وسى كورسەتكىشتەرگە قاراماستان، بريتانيانىڭ ورتالىق قالاسى الەمدىك دەڭگەيدە ەڭ قاۋىپسىز قالالاردىڭ قاتارىندا تۇر.

بريتانيا ۇكىمەتى جاسوسپىرىمدەر اراسىنداعى پىشاق ارقىلى قول سالۋ جانە باسقا دا قىلمىستاردى بولدىرماۋ ماقساتىندا قوعامدىق جارنامالار تاراتۋدا. بۇل ءۇشىن ۇكىمەت تارابى 1,8 ملن اقش دوللارى كولەمىندە قارجى بولگەن.

الەمگە تانىمال الىپ شاھاردىڭ ءبىرى ماسكەۋدى ايتا كەتەر بولساق، 2018 جىلدىڭ العاشقى ەكى ايىندا بۇل قالادا 44 ادامعا قاستاندىق جاسالعان. دەگەنمەن، مالىمەتتەرگە جۇگىنسەك رەسەيدىڭ باس قالاسىندا قاستاندىقپەن كىسى ءولتىرۋ ىستەرى جىلدان جىلعا ازايىپ بارا جاتقان كورىنەدى. ايتالىق، 2010 جىلى 582 قىلمىستىق ءىس تىركەلسە، 2013 جىلعا جەتكەندە 379 ادام، ال 2017 جىلى بۇل كورسەتكىش 315 ادامعا دەيىن ازايعان. ماسكەۋدە شامامەن 12,5 ملن تۇرعىن بار.

 “The Qazaq Times”