فوتو: Reuters

ءسۇريا مەملەكەتتىك اقپارات اگەنتتىكتەرى مەن تىلشىلەرى شىعىس گۋتادا قالعان "جەيش ءال-يسلام" (يسلام اسكەرى) اتتى سوڭعى كوتەرىلىسشىلەر توبىنىڭ اتالعان ايماقتان كەتەتىندەرىنە قاتىستى سۇريامەن كەلىسىمگە كەلگەنىن حابارلاۋدا.

ەكىجاقتى كەلىسوزدەرگە ارنالعان كەزدەسۋلەردە "جەيش ءال-يسلام" توبىنىڭ شىعىس گۋتادان شىعارىلۋىنا قاتىستى ماسەلە جان-جاقتى تالقىلانعان. ءسۇريا مەملەكەتتىك اگەنتتىگى "سانا" (SANA), "جەيش ءال-يسلام" توبىنىڭ الەپپونىڭ سولتۇستىگىنە كەتەتىنىن حابارلاعانمەن، لوندوندا ورنالاسقان ءارى وسى وپپوزيتسيالىق توپقا ءبىرتابان جاقىن سانالاتىن ءسۇريا ادام قۇقىقتارى جونىندەگى عىلىمي مەكەمەسى اتالعان توپتىڭ ءسۇريانىڭ ءال-باب قالاسىنا قاراي بەت الاتىنىن ايتقان. ەگەر وسى مالىمەت راستالسا، ءسۇريا پرەزيدەنتى باشار اساد ەل استاناسى شامعا (داماسك) جاقىن جەردەگى ەڭ سوڭعى كوتەرىلىسشىلەر توبىنا تيەسىلى بەكىنىستى دە الىپ، وتە ماڭىزدى اسكەري-ساياسي جەتىستىككە جەتكەن بولىپ سانالادى. سونداي-اق، ءسۇريا مەملەكەتتىك تەلەارنالارى اتالعان توپپەن بىرگە ونىڭ قارۋ-جاراقتارىنىڭ دا تاركىلەنەتىنىن حابارلاپ وتىر.

"حيزبۋللاھ" ليۆاندىق شيتتىك اسكەري ۇيىمىنا جاقتاس اقپارات ۇيىمى دا وسى كەلىسىمنىڭ وتە جاقىن كۇندەرى جۇزەگە اسىرىلاتىنىن مالىمدەدى. سونىمەن قاتار، كوتەرىلىسشىلەر توبىنىڭ بەتى قايتارىلعاننان كەيىن ءسۇريا ۇكىمەتىنىڭ ماقۇلداۋىمەن جەرگىلىكتى ءبىر كەڭەستىڭ قۇرىلاتىنى دا بەلگىلى بولدى.

فوتو: Reuters

سۇرياداعى قاقتىعىس ۋشىققان ايماقتاردى باقىلاۋعا جاۋاپتى يران، رەسەي جانە تۇركيانىڭ كوتەرىلىسشى توپتىڭ قولىنداعى اسكەري تۇتقىندارىنىڭ ازات ەتىلۋلەرى ءۇشىن كومەككە كەلەتىندىكتەرى حابارلانعان.  دەگەنمەن، رەيتەر (Reuters) اقپارات اگەنتتىگى قويعان سۇراقتارعا جاۋاپ بەرگەن ۇيىمنىڭ ساياسي بەلسەندىسى وسى ايتىلعانداردىڭ ءبارىن جوققا شىعارىپ: "مۇنداي جاڭالىقتارمەن "پسيحولوگيالىق سوعىس" جۇرگىزۋگە تىرىسۋدا" ، - دەگەن.

قازىرگى ۋاقىتتا ءسۇريا بيلىگى التى اپتادان بەرى جالعاسقان بومبالاۋ ارەكەتتەرىنىڭ ارتىنشا شىعىس گۋتانىڭ 95 پايىزىن باقىلاۋعا العان. ءسۇريا ادام قۇقىقتارى جونىندەگى عىلىمي مەكەمە وسى بومبالاۋ ارەكەتتەرى كەزىندە 1.600 بەيبىت تۇرعىننىڭ قازا تاپقانىن حابارلادى. كەيبىر ساراپشىلاردىڭ ءسۇريا ۇكىمەتى مەن اتالعان كوتەرىلىسشىلەر توبىنىڭ اراسىنداعى كەلىسىم ارقىلى شىعىس گۋتادا سوڭعى اپتالاردا بارلىعى 46 مىڭ تۇرعىن مەن اسكەري قىزمەتكەرلەردىڭ  كوشىرىلگەنىن بولجاۋدا.

“The Qazaq Times”