64 ادامنىڭ ءومىرىن قيعان رەسەيدىڭ كەمەروۆا قالاسىنداعى «زيمنيايا ۆيشنيا» ساۋدا ورالىعىندا بولعان ءورت قوعامدا قىزۋ تالقىلاندى. وسىعان بايلانىستى بۇگىن ءبىز سوڭعى جىلدارى تمد اۋماعىندا بولعان وسىعان ۇقساس وقيعالارعا قىسقاشا توقتالۋدى ءجون كوردىك.

2009 جىلدىڭ 5 جەلتوقسانى رەسەيدىڭ پەرم قالاسىندا «حرومايا لوشاد» تۇنگى كلۋبى ورتكە وراندى. سالدارىنان 156 ادام كوز جۇمىپ، ونداعان ادام ءتۇرلى دەنە جاراقاتتارىن الدى. ءورت پيروتەحنيكالىق قۇرالداردى دۇرىس پايدالانباۋدان بولدى.

2010 جىلدىڭ مامىر ايىنىڭ 24-ءى كۇنى الماتى قالاسىندا «رەسەي» سۋپەرماركەتى ورتەندى. دوستىق داڭعىلى بويىنداعى تۇرعىن ءۇيدىڭ تومەنگى قاباتىندا ورنالاسقان امبەباپ دۇكەننىڭ ورتەنۋى سالدارىنان 300 ادام ەۆاكۋاتسيالانىپ، 2500 شارشى مەتر اۋماق كۇل-قوقىسقا اينالدى.

2012 جىلدىڭ 3 تامىزىندا قىرعىزستاننىڭ بىشكەك قالاسىندا "ورتو-ساي" بازارى ورتكە وراندى. ءورت بازار اۋماعىندا ورنالاسقان «ەۋرو مەبەل» دۇكەنىنەن باستالىپ، 600 شارشى مەتر پاۆيلون شاتىرى تولىقتاي جانىپ كەتتى.

2013 جىلدىڭ 13 قىركۇيەگىندە الماتى قالاسىنداعى «ولجا»، «ايان» جانە «كەرەمەت-1» بازارلارى ورتەندى. ءتىلسىز جاۋ بازار اۋماعىنىڭ 5400 شارشى مەتر اۋماعىن شارپىپ، ءورتتى سوندىرۋگە 1518 ادام، 115 تەحنيكا جانە 2 تىكۇشاق تارتىلدى. كەيىننەن ءورتتىڭ شىعۋىنا «ولجا» بازارىنىڭ ديرەكتورى مۇساعالي الدابەرگەنوۆ كىنالى دەپ تانىلىپ، 4 جىلعا باس بوستاندىعىنان ايىرىلدى.

2015 جىلدىڭ 26 ساۋىرىندە الماتى قالاسىندا «ادەم» ساۋدا ورتالىعى ورتكە وراندى. وقيعا بولعان ساتتە ءورت سوندىرۋشىلەر قىزمەتىنە بىردەن كىرىسىپ كەتە المادى. سەبەبى عيماراتتاعى اۆتوماتتى ورتكە قارسى قۇرالدىرى ىستەمەيتىن بولىپ شىقتى. ال عيمارات سىرتىنداعى ءورت جاعدايىندا پايدالانىلاتىن قۇرىلعىدا سۋ بولمادى. سالدارىنان 25 مىڭ شارشى مەتر ايماقتىڭ كۇلى كوككە ءۇشتى.

2015 جىلدىڭ 11 ناۋرىزىندا تاتارستاننىڭ قازان قالاسىندا «ادميرال» ساۋدا ورتالىعى ورتەندى. سالدارىنان 19 ادام كوز جۇمىپ، ونداعان ادام ءتۇرلى دەنە جاراقاتتارىن الدى. تەكسەرۋ بارىسىندا عيماراتتىڭ ساۋدا ورتالىعىنا ارنالىپ سالىنباعاندىعى جانە ورتالىق قىزمەتكەرلەرىنىڭ قاراپايىم ءورت قاۋىپسىزدىگىن ساقتاماعاندىعى انىقتالىپ، 12 ادام سوتقا تارتىلدى. العاشقى سوت وتىرىسى 2017 جىلدىڭ ناۋرىز ايىندا بولدى. سوت ءالى كۇنگە دەيىن جالعاسۋدا.

2018 جىلدىڭ 30 قاڭتارىندا بىشكەك قالاسىنىڭ «وش» بازارى ورتكە وراندى. سالدارىنان 3500 شارشى شاقىرىم اۋماق كۇل-قوقىسقا اينالدى. رەسمي مالىمەتتەر بويىنشا زارتاپ شەككەندەر مەن جاراقات العاندار جوق.

“The Qazaq Times”