يەمەن ساۋد ارابياسىنا قاراتا جەتى بەردەي زىمىران اتتى – دەپ حابارلايدى Al Arabiya تەلەارناسى.

Al Arabiya مالىمەتىنشە، ساۋد ارابيا اۋە قورعانىسى يەمەن اۋماعىنان ەل استاناسى ەر-رياد قالاسىنا قاراتا باعىتالعان جەتى بىردەي بالليستيكالىق زىمىراندى اتىپ قۇلاتقان. ساۋد-ارابيا رەسمي حابار اگەنتتىگىنىڭ حابارلاۋىنشا، ازاماتتىق قورعانىس ىستەرىنىڭ ەر-رياد ايماعىنداعى ءباسپاسوز حاتشىسى مۇحاممەد ءال-حامادي، يەمەننەن ەر-ريادقا ۇشىرىلعان بالليستيكالىق زىمىرانداردىڭ اۋەدە جويىلعانىن، الايدا ونىڭ قالدىقتارىنىڭ ەل استاناسىنىڭ ءتۇرلى ايماقتارىنا قۇلاعانىن ايتقان. حامادي، زىمىران قالدىقتارىنىڭ مىسىرلىق ازاماتتار تۇراتىن ءبىر ۇيگە قۇلاپ، سالدارىنان 1 ادامنىڭ ومىرىمەن قوش ايتىسقانىن، ال قالعان ەكەۋىنىڭ قاتتى جاراقاتتانعانىن حابارلاعان.

ەستەرىڭىزگە سالايىق، بۇعان دەيىن يەمەننىڭ حۋسيت بۇلىكشىلەرى ساۋد ارابياسى باستاعان اسكەري كواليتسياعا تيەسىلى «F-15» جانە «Tornado» بومبالاۋشى ۇشاقتارىن اتىپ قۇلاتقان. كەيىننەن حۋسيت بۇلىكشىلەرى باقىلاۋىنداعى ايماققا قۇلاعان ۇشقىشتاردى ساۋد ارابيا قارۋلى كۇشتەرى قۇتقارىپ الدى.

ايتا كەتۋ كەرەك، يەمەندە زاڭدى ۇكىمەت كۇشتەرىنە قارسى كۇرەسكەن حۋسيتتەر تاراپىنان بۇدان بۇرىن دا ەر-ريادقا باعىتتالعان بالليستيكالىق زىمىراندار كوزدەلگەن جەرىنە جەتپەي تۇرىپ جويىلعان بولاتىن. يەمەندە توڭكەرىس جاساعان حۋسيتتەر 2014 جىلدىڭ قىركۇيەك ايىنان بەرى ەل استاناسى سانادان باستاپ بىرقاتار ايماقتاردى ءوز باقىلاۋلارىنا العان. ال ساۋد ارابيا جەتەكشىلىگىندەگى وداق كۇشتەرى 2015 جىلدىڭ ناۋرىز ايىنان بۇگىنگە دەيىن زاڭدى بيلىككە باعىنىشتى كۇشتەرگە قولداۋ كورسەتىپ كەلەدى.

“The Qazaq Times”