ترامپتىڭ جەكە كومەكشىسى دجون ماكەنتە. فوتو: WSJ.

دونالد ترامپ اق ۇيگە قوجا بولعان ءبىر جىلدام استام ۋاقىت ىشىندە اقش ۇكىمەتىندەگى جوعارى لاۋازىمدىلاردىڭ اۋىس-كۇيىسى تولاستامادى. سوڭعى ەكى كۇندە ترامپ اينالاسىنداعى بىرنەشە ماڭىزدى ادامدى اق ۇيدەن شىعارىپ سالدى. سونىڭ ەڭ ەلەۋلىسى اقش مەملەكەتتىك حاتشىسى تيللەرسوندى قىزمەتتەن الىپ تاستاۋ بولدى. ال، دۇيسەنبى كۇنى ترامپ ءوزىنىڭ جەكە كومەكشىسى دجون ماكەنتەنىڭ (John McEntee)  جۇمىسىن توقتاتقان. بۇل تۋرالى سول ەلدەگى «WSJ» باسىلىمى حابارلادى.

اق ءۇيدىڭ قىزمەتكەرلەرىنىڭ ايتۋىنشا، ماكەنتەنىڭ جۇمىستان قۋىلۋ سەبەبى انىق ەمەس، قاۋىپسىزدىك ماسەلەسىنە بايلانىستى بولۋى مۇمكىن دەگەن جورامالدار ايتىلادى. بۇل ءىس تۋراسىندا اق ءۇي ءباسپاسوز حاتشىسى سارا ساندەرس تە تۇسىنىكتەمە بەرۋدەن باس تارتقان. ول جۋرناليستەردىڭ سۇراعىنا: «كادرلاردى اۋىستىرۋ ماسەلەسى تۋرالى مەن تۇسىنىكتەمە بەرە المايمىن»، – دەگەن ءۇزىلدى كەسىلدى جاۋابىن عانا ايتقان.

ماكەنتە ترامپتىڭ جانىندا ۇزاق ۋاقىت بولعان كومەكشىلەردىڭ ءبىرى. ول ءتىپتى ترامپتىڭ كۇيەۋ بالاسى كۋشنەرمەن بىرگە ول پرەزيدەنت بولۋدان بۇرىن دا سەنىمدى جەكە كومەكشىلەرىنىڭ ءبىرى بولعان. الايدا، ماكەنتە وزگە كومەكشىلەرى سەكىلدى كوپشىلىك جۇرتقا تانىمال ەمەس. تەك ونىڭ سوڭعى 3-4 جىل ىشىندە ترامپپەن ەڭ جاقىن قارىم-قاتىناستا بولعان ادامنىڭ ءبىرى ەكەنى بەلگىلى. دەگەنمەن، ونىڭ جۇمىستان قۋىلۋ سەبەبى انىق ەمەس. قىزمەتتەستەرىنىڭ ءبىرى بۇل ونىڭ جەكە ىسىنە بايلانىستى بولعانىن ايتقان. ال، ماكەنتە تۇسىنىك بەرۋدەن باس تارتتى.

اق ۇيدەگى كادرلىق اۋىس-كۇيىستەر كوبىنە قاۋىپسىزدىك ماسەلەسىنە بايلانىستى بولىپ جاتقانى انىق. وسىدان بۇرىن ترامپتىڭ كۇيەۋ بالاسى قۇپيا مالىمەتتەرگە قول جەتكىزۋ قۇقىعىنان ايىرىلعان ەدى.

 “The Qazaq Times”