Tramptıñ jeke kömekşisi Djon MakEnte. Foto: WSJ.

Donal'd Tramp Aq üyge qoja bolğan bir jıldam astam uaqıt işinde AQŞ ükimetindegi joğarı lauazımdılardıñ auıs-küyisi tolastamadı. Soñğı eki künde Tramp aynalasındağı birneşe mañızdı adamdı Aq üyden şığarıp saldı. Sonıñ eñ eleulisi AQŞ memlekettik hatşısı Tillersondı qızmetten alıp tastau boldı. Al, düysenbi küni Tramp öziniñ jeke kömekşisi Djon MakEnteniñ (John McEntee)  jwmısın toqtatqan. Bwl turalı sol eldegi «WSJ» basılımı habarladı.

Aq üydiñ qızmetkerleriniñ aytuınşa, MakEnteniñ jwmıstan quılu sebebi anıq emes, qauipsizdik mäselesine baylanıstı boluı mümkin degen joramaldar aytıladı. Bwl is turasında Aq üy baspasöz hatşısı Sara Sanders te tüsinikteme beruden bas tartqan. Ol jurnalisterdiñ swrağına: «Kadrlardı auıstıru mäselesi turalı men tüsinikteme bere almaymın», – degen üzildi kesildi jauabın ğana aytqan.

MakEnte Tramptıñ janında wzaq uaqıt bolğan kömekşilerdiñ biri. Ol tipti Tramptıñ küyeu balası Kuşnermen birge ol prezident boludan bwrın da senimdi jeke kömekşileriniñ biri bolğan. Alayda, MakEnte özge kömekşileri sekildi köpşilik jwrtqa tanımal emes. Tek onıñ soñğı 3-4 jıl işinde Tramppen eñ jaqın qarım-qatınasta bolğan adamnıñ biri ekeni belgili. Degenmen, onıñ jwmıstan quılu sebebi anıq emes. Qızmettesteriniñ biri bwl onıñ jeke isine baylanıstı bolğanın aytqan. Al, MakEnte tüsinik beruden bas tarttı.

Aq üydegi kadrlıq auıs-küyister köbine qauipsizdik mäselesine baylanıstı bolıp jatqanı anıq. Osıdan bwrın Tramptıñ küyeu balası qwpiya mälimetterge qol jetkizu qwqığınan ayırılğan edi.

 “The Qazaq Times”