فوتو: Ratel.kz

مۇراتحان توقمادي سوتىندا ۇلتتىق قاۋىپسىزدىك كوميتەتىنىڭ ەكس-توراعاسى نارتاي دۇتباەۆ جاۋاپ بەردى.

تاراز قالاسىندا بتا بانك توراعاسى ەرجان تاتىشەۆتىڭ ولىمىنە قاتىستى كۇدىكتى مۇراتحان توقماديدىڭ سوتى جالعاسۋدا. سوت بارىسىندا مەملەكەتتىك ايىپتاۋشى كۋاگەر رەتىندە ۇقك-نىڭ بۇرىنعى توراعاسى نارتاي دۇتباەۆتان جاۋاپ الۋ تۋرالى تالاپ ارىز ءتۇسىردى. پروكۋروردىڭ تالاپ ارىزىن سوت قاناعاتتاندىردى.

2017 جىلى «مەملەكەتتىك قۇپيانى جاريالاۋ» جانە «اسا ءىرى كولەمدە قارجى جىمقىرۋ» ءىسى بويىنشا كىنالى دەپ تانىلىپ، 12 جىلعا باس بوستاندىعىنان ايىرىلعان ۇلتتىق قاۋىپسىزدىك كوميتەتىنىڭ ەكس-توراعاسى نارتاي دۇتباەۆ تەرگەۋ بارىسىندا 2004 جىلى قۋعىنداعى ساياساتكەر مۇحتار ابىليازوۆپەن بىرىگىپ جۇمىس ىستەگەنىن راستادى. دۇتباەۆتىڭ سوزىنشە، ول ادىليازوۆقا تاتىشەۆتىڭ تەلەفونىن باقىلاۋعا قويۋ ارقىلى اقپارات الۋعا كومەكتەسكەن جانە مۇراتحان توقماديدىڭ تاتىشەۆتىڭ جاقىن تانىستارىنىڭ ءبىرى ەكەندىگىن ايتقان.

بىراق دۇتباەۆ پروكۋروردىڭ «ءسىز ءابىليازوۆتىڭ بۇل اقپاراتتاردى تاتىشەۆتى ولتىرۋگە پايدالاناتىنىن ءبىلدىڭىز بە؟» - دەگەن سۇراعىنا: «جوق مەن ول جايىندا بىلمەدىم. مەن بۇل اقپاراتتاردى تاتىشەۆپەن سويلەسۋ ءۇشىن جيناپ جاتىر دەپ ءتۇسىندىم. ونىڭ بۇل اقپاراتتاردى تاتىشەۆتى ولتىرۋگە پايدالاناتىنىن بىلگەن جوقپىن» - دەگەن.

ەستەرىڭىزگە سالايىق، بۇعان دەيىن باق بەتتەرىندە ناۋرىز ايىنىڭ 8-ءى كۇنى مۇراتحان توقماديدىڭ جامبىل وبلىستىق اۋرۋحاناسىنان قاشىپ كەتكەندىگى جونىندە اقپارات تاراعان. كەيىننەن 9 ناۋرىز كۇنى ۇلتتىق قاۋىپسىزدىك قىزمەتى ونىڭ ۇستالعانىن مالىمدەگەن.

مۇراتحان توقماديگە 2004 جىلى اڭشىلىق كەزىندە وققا ۇشقان بتا بانك توراعاسى "ەرجان تاتىشەۆتى ءولتىردى" - دەگەن ايىپ تاعىلعان. ايىپتاۋشى تاراپتىڭ سوزىنشە، توقماديگە تاتىشەۆتى ولتىرۋگە بەلگىلى بانكير مۇحتار ءابىليازوۆ تاپسىرىس بەرگەن. بىراق قۋعىنداعى بانكير مۇحتار ءابىليازوۆتىڭ ءوزى بۇل ايىپپەن تولىقتاي كەلىسپەيدى جانە ءوزىن نازارباەۆ رەجيمىنىڭ قۇربانىمىن دەپ ەسەپتەيدى.

“The Qazaq Times”