سولتۇستىك كورەيا ليدەرىنىڭ قارىنداسى اقش لاۋازىمدىلارىنىڭ ءسوزىن كەلەكە ەتتى

22 ماۋسىم، سەيسەنبى كۇنى سولتۇستىك كورەيا ليدەرىنىڭ قارىنداسى اقش لاۋازىمدىلارىنىڭ كەلىسسوزدەردى قايتا باستاۋ تۋرالى ۇسىنىسىن كەلەكە ەتىپ مالىمدەمە جاسادى. كيم جوڭ ۋننىڭ قارىنداسى ءارى ەلدەگى بيلىك پارتياسى وك حاتشىسىنىڭ ورىنباسارى كيم يو جين بۇنداي مالىمدەمەسىن ەلدەگى ەڭ ءىرى رەسمي اقپارات ارناسى ارقىلى جاساعان.  

وتكەن اپتانىڭ سوڭىندا جو بايدەننىڭ ۇلتتىق قاۋىپسىزدىك جونىندەگى كەڭەسشىسى جەيك سالليۆان اقش-سولتۇستىك كورەيا قارىم-قاتىناسى تۋرالى مالىمدەمە جاساپ، كەلىسسوزدەردى قايتا باستاۋ تۋرالى ۇسىنىستى العا تارتقان ەدى. كيم يو جوڭ (Kim Yo-Jong) كەزەكتى مالىمدەمەسى جەيك سالليۆانعا بەرگەن جاۋاپ قاتارىندا باعالاندى.

سالليۆاننىڭ مالىمدەمەسىنەن بۇرىن سولتۇستىك كورەيانىڭ ەڭ جوعارى باسشىسى كيم جوڭ ۋن جۇمىسشى پارتياسى ورتالىق كوميتەتىنىڭ جينالىسىندا اقش-قا قاراتقان پوزيتسيادا «كەلىسسوزگە دە، قارسىلاسۋعا دا دايىن بولۋ» كەرەك دەگەن ماعىنادا مالىمدەمە جاساعان بولاتىن. اق ءۇيدىڭ ۇلتتىق قاۋىپسىزدىك جونىندەگى كەڭەسشىسى سالليۆان امەريكالىق تەلەارنالاردىڭ كيم جوڭ ۋننىڭ مالىمدەمەسىن «قىزىقتى سيگنال» دەپ باعالاعان ەدى.

ال، كيم يو جوڭ اقش لاۋازىمدىلارىن «بوس قيىل»، «قۇر ارمان» قۋالاپ وتىر دەپ كەكەتكەن. ول ءسوز اراسىندا: «سولتۇستىك كورەيادا “ارمان ارينە جاقسى، بىراق ول ەشتەڭەگە جارامايدى” دەگەن ءسوز بار. امەريكا قۇراما شتاتتارى سويلەسۋلەر ارقىلى ماستۋرباتسيا جاساپ ارماندارىن جۇزەگە اسىرعان بولادى»، – دەيتىن پىكىرىن جەتكىزگەن.

كيم يو جوڭنىڭ كەزەكتى مالىمدەمەسى اقش-تىڭ سولتۇستىك كورەيا ىستەرى بويىنشا جاڭا تاعايىندالعان ارنايى وكىلى سۋن كيمنىڭ وڭتۇستىك كورەيا مەن جاپونياعا ساپارى قارساڭىندا جاسالىپ وتىر. سۋن كيم وسى اپتادا وڭتۇستىك كورەيا پرەزيدەنتى ءمۇن جاينمەن كەزدەسىپ، سولتۇستىك كورەيانىڭ ماسەلەسى تۋرالى تالقىلايدى دەپ كۇتىلۋدە. ول ساپارىنان بۇرىن پيوڭياڭعا قاراتا «كەز-كەلگەن ۋاقىتتا، كەز-كەلگەن جەردە ەشقانداي العىشارتسىز كەزدەسۋ نەمەسە سويلەسۋگە دايىن ەكەنىن»، الداعى ۋاقىتتا سولتۇستىك كورەيا تارابىنان «وسىنداي ۇسىنىس جاسالادى دەپ ۇمىتتەنەتىنىن» ايتقان بولاتىن.

كيم يو جوڭنىڭ كەزەكتى مالىمدەمەسى اقش-سولتۇستىك كورەيا قاتىناسىندا ءالى دە كۇردەلى تۇسىنىسپەستىكتىڭ جاتقانىن كورسەتتى. سولتۇستىك كورەيانى بيلەپ وتىرعان اۋلەتتىڭ وكىلى، ءارى بيلىكتەگى ماڭىزدى ادامداردىڭ ءبىرى بولعان كيم يو جوڭ ەلدىڭ سىرتقى ساياساتىن بەلگىلەۋشى ەكەنى دە ايرىقشا نازار اۋدارتادى.

“The Qazaq Times”