تۇركىمەنستان پرەزيدەنتى قۇربانعۇلى بەردىمۇحامەدوۆ. فوتو: Sputnik International

تۇركىمەنستان پرەزيدەنتى قۇربانعۇلى بەردىمۇحامەدوۆ استانا قالاسىندا وتەتىن ورتالىق ازيا ەلدەرى باسشىلارىنىڭ سامميتىنە قاتىسۋدان باس تارتتى.

وسىدان ءبىراز ۋاقىت بۇرىن باق وكىلدەرى 22 ناۋرىز كۇنى استانا قالاسىندا ورتالىق ازيا ەلدەرى باسشىلارىنىڭ ءسامميتى وتەتىندىگىن جارىسا جازعان. ءبىرى قازاقستان پرەزيدەنتى نۇرسۇلتان نازارباەۆ پەن وزبەكستان باسشىسى شاۆكات ميرزيەەۆ ورتالىق ازيانىڭ باسىن بىرىكتىرمەك دەسە، ەندى ءبىرى استانا مەن تاشكەنتتىڭ بۇل قادامىنان تۇك شىقپايدى دەگەن. ارادا ەكى ايعا جەتەر-جەتپەس ۋاقىت وتكەندە رەسمي اشحابادتان «قۇربانعۇلى بەردىمۇحامەدوۆ استاناعا بارمايدى، ول ءوزىنىڭ ورنىنا پارلامەنت سپيكەرى اكدجان نۇربەردىيەۆتى جىبەرەدى» - دەگەن حابار جەتتى. ونىڭ نە سەبەپتى بۇنداي شەشىم قابىلداعانى ازىرگە بەلگىسىز. بىراق ساياساتتانۋشى دوسىم ساتپاەۆ بۇل جايىندا بىلاي دەيدى: «بەردىمۇحامەدوۆتىڭ سامميتكە قاتىسپاۋىنان ەشنارسە وزگەرمەيدى. تاجىكستان ايماقتى جاقىنداستىراتىن ويىنشى ەمەس. اشحابادتان ءدال وسى جاعدايدا قانداي دا ءبىر بەلسەندىلىك نەمەسە ۇسىنىس كۇتۋدىڭ قاجەتى جوق. بۇل جەردە ۇسىنىستى قازاقستان مەن وزبەكستان جاسايدى. ەۋرووداقتاقتى مىسالعا الاتىن بولساق، ول جەردە قوزعاۋشى كۇش فرانتسيا مەن گەرمانيا. باسقالارىنىڭ بەلسەندىلىگى تومەن. ەگەر استانا مەن تاشكەنت ايماقتىڭ قوزعاۋشى كۇشى بولا الاسا، وندا وزگە ساياسي ويىنشىلار وزدىگىنەن كەلەدى».

تۇركىمەنستان پرەزيدەنتىنىڭ استاناعا كەلۋدەن باس تارتۋى اسا ءبىر ۇلكەن ماسەلە ەمەس ەكەندىگى ايتپاسا دا تۇسىنىكتى. ونىڭ ۇستىنە سامميت فورماتىنىڭ ءوزى دە تەك "اقىل-كەڭەس" دەڭگەيىندە عانا بولادى دەپ كۇتىلۋدە. الدىن الا كەلىسىم بويىنشا ايماق باسشىلارى بۇل جولعى كەزدەسۋدە تەك وي الماسۋ، پىكىر بولىسۋدەن ارى اسپايدى. دەسە دە بۇل جولعى باس قوسۋدىڭ الار ورنى ەرەكشە. سەبەبى ورتالىق ازيا ەلدەرى باسشىلارى اراعا 13 جىل سالىپ بەس جاقتىق كەزدەسۋ وتكىزبەك.

جالپى، قۇربانعۇلى بەردىمۇحامەدوۆتىڭ بۇل شەشىمى تۇركىمەنستاننىڭ قاي باعىتتا كەتىپ بارا جاتقانىن اڭعارتادى. رەسمي اشحاباد ايماقتىڭ ءبىر بولىگى بولسا دا، ول ۇقشۇ، ەاەو، شىۇ سياقتى ەكونوميكالىق نەمەسە ينتەگراتسيالىق جوبالاردىڭ ەشقايسىسىنا مۇشە ەمەس. ءبىر سوزبەن ايتقاندا بەردىمۇحامەدوۆ وزبەكستاننىڭ بۇرىنعى پرەزيدەنتى يسلام كارىموۆتىڭ جابىق ەسىك جاعدايىنداعى ساياساتىن ۇستانىپ وتىر.

“The Qazaq Times”