فوتو: EPA/EFE

سلوۆاكيا پرەزيدەنتى اندرەي كيسكا جۋرناليست يان كۋچاكتىڭ ولىمىنەن كەيىن، بيلىكتە بولىپ جاتقان داعدارىسقا بايلانىستى ۇكىمەت قۇرامىن وزگەرتۋدى نە مەرزىمىنەن بۇرىن پارلامەنت سايلاۋىن وتكىزۋدى تالاپ ەتتى. ول بۇل مالىمدەمەسىن تەلەديدار ارقىلى جولدادى، دەپ حابارلادى ورتالىق ازيا جاڭالىقتار قىزمەتى. 

پرەزيدەنت سلوۆاكيا ۇكىمەتىن "وركوكىرەك" دەپ ايىپتادى. ول بيلىكتىڭ حالىققا سەنىمىن قالپىنا كەلتىرۋ ءۇشىن، ۇكىمەتتىڭ قانداي ساياسي شەشىمدەر قابىلدايتىنىن ءبىر اپتا كۇتكەنىن جەتكىزدى. بىراق ول ەشقانداي ۇسىنىستار ەستىمەگەن. "كەيبىرى وتستاۆكاعا كەتتى، بىراق مەن حالىق سەنىمىن تۋعىزاتىن ەشقانداي جوسپار كورىپ تۇرعان جوقپىن", - دەپ اتاپ ءوتتى پرەزيدەنت.

جۋرناليست يان كۋچاكتى 25 اقپاندا قۇربىسىمەن بىرگە براتيسلاۆادان 65 شاقىرىم جەردەگى ۇيىندە ءولتىرىپ كەتكەن. ءبىر اپتادان كەيىن سلوۆاكيانىڭ مادەنيەت ءمينيسترى مارەك ماداريچ وتستاۆكاعا كەتتى. "مەن مادەنيەت ءمينيسترى رەتىندە، ءجۋرناليستى ءولتىرىپ جاتقاندا، قاراپ وتىرا المايمىن", – دەپ مالىمدەگەن ماداريچ.

جۋرناليست ءولىمىنىڭ سەبەبى ءالى انىقتالمادى. بىراق ونىڭ ارىپتەستەرىنىڭ سوزدەرىنە قاراعاندا، يان كۋچاكتى كاسىبي قىزمەتىنە بايلانىستى ولتىرگەن. جۋرناليست يتاليالىق مافيانىڭ سلوۆاكيا ۇكىمەتىنە ىقپالىن زەرتتەگەن. اتاپ ايتقاندا، ول پرەمەر-مينيستر روبەرت فيتسونىڭ ماڭايىنداعى ادامداردىڭ مافيالىق توپقا جاتاتىن يتاليالىق كاسىپكەرلەرمەن تىعىز بايلانىستا ەكەنىن اشقان.

“The Qazaq Times”