قر پرەمەر-ءمينيسترىنىڭ ءبىرىنشى ورىنباسارى اسقار مامين مەن سقو اكىمى قۇمار اقساقالوۆ.

بۇگىن قر پرەمەر-ءمينيسترىنىڭ ءبىرىنشى ورىنباسارى اسقار مامين جۇمىس ساپارىمەن سقو-دا بولدى. الدىمەن ءبىرىنشى ۆيتسە-پرەمەر پەتروپاۆل اۋەجايىنا باردى، دەپ حابارلادى وبلىس اكىمدىگىنىڭ ءباسپاسوز قىزمەتى.

بۇدان سوڭ اسقار مامينگە وبلىستا 2018 جىلى جول جوندەۋ بويىنشا اتقارىلاتىن جۇمىستار تۋرالى باياندالدى.

پرەمەر-ءمينيستردىڭ ءبىرىنشى ورىنباسارى جاڭادان سالىنىپ جاتقان «جاس وركەن» ىقشام اۋدانىنداعى وقۋشىلار سارايىنىڭ قۇرىلىس بارىسىمەن تانىستى. اسقار مامينگە «جاس وركەن» ىقشام اۋدانىنىڭ قۇرىلىس جوسپارى دا تانىستىرىلدى. بۇل شاعىن اۋداندا 2700 پاتەردى قولدانىسقا بەرۋ كوزدەلگەن، مەكتەپ بوي كوتەرەدى. قازىردىڭ وزىندە سپورت سارايى جانە  تەننيس ورتالىعىنىڭ قۇرىلىسى اياقتالدى.

جينالىستا قازاقستان جانە رەسەي وڭىرارالىق ىنتىماقتاستىق فورۋمىنا دايىندىق بارىسى تالقىعا ءتۇستى.   اسقار مامين فورۋمنىڭ جوعارى دەڭگەيدە وتەتىندىگىنە سەنىمىن جەتكىزدى. فورۋمنىڭ تاقىرىبى - «قازاقستان مەن رەسەيدىڭ ءتۋريزمىن دامىتۋدىڭ جاڭا جولدارى مەن ۇردىستەرى». اسقار مامين تۋريزم تاقىرىبىنىڭ تاڭدالۋى كەزدەيسوق ەمەس دەيدى.

«ءبىز تۋريزم سالاسىن دامىتۋعا كوپ كوڭىل بولەمىز. بۇل سالانىڭ پوتەنتسيالى جوعارى. پەتروپاۆل كەزدەيسوق تاڭدالىنىپ الىنعان جوق. سىزدەردىڭ وڭىرلەرىڭىز تۋريزم سالاسىندا ۇلكەن مۇمكىندىكتەرگە يە. تۋريستەر تۋرالى ايتاتىن بولساق، ءبىزدىڭ نازارىمىز رەسەي نارىعىنا دا اۋىپ وتىر. فورۋم ءوڭىردىڭ جانە جالپى قازاقستاننىڭ تۋريزمدەگى بار پوتەنتسيالىن كورسەتۋگە ۇلكەن مۇمكىندىك بەرىپ وتىر»،- دەدى اسقار مامين.

وبلىس اكىمى قۇمار اقساقالوۆ وڭىردەگى ءتۋريزمنىڭ دامۋىنا دا كەڭىنەن توقتالىپ ءوتتى. ءوڭىر باسشىسى وقۋشىلار سارايىن  IT-تەحنولوگيالارمەن جاراقتاندىرۋ تۋرالى  باياندادى. IT ورتالىقتا تانىمدىق جانە ويىن-ساۋىق قىزمەتتەرىنىڭ ءتۇر-ءتۇرى كورسەتىلەدى. بۇل كينوستۋديا، كيبەر قاۋىپسىزدىك جانە ۆيرتۋالدى شىندىق كابينەتى، باعدارلاۋ زەرتحاناسى، كينوتەاتر جانە تاعى باسقالارى.  IT ورتالىق وڭىردە بالالار ءتۋريزمىن دامىتۋعا ءوز سەپتىگىن تيگىزبەك.

«تۋريزم تاقىرىبى وڭىرگە جانە ەلىمىزدىڭ تۋريزم سالاسىنا ۇلكەن سەرپىن بەرمەك. قازىر سالىنىپ جاتقان وقۋشىلار سارايىنا قازاقستان مەن رەسەيدىڭ كورشىلەس وڭىرلەرىنەن بالالار كەلۋ كەرەك. ورتالىق سوڭعى IT تەحنولوگيالارمەن جاراقتاندىرىلماق. بالالارعا ارنالعان ويىن-ساۋىق تۇرلەرى كوپ بولادى»، -دەدى قۇمار اقساقالوۆ.

سقو-دا تۋريزم سالاسىندا بىرنەشە جوبا جۇزەگە اسىرىلماق. يمانتاۋ-شالقار كۋرورت ايماعىندا دەمالىس ورىندارى جانە اۆتوكارانينگ سالىنادى. تاعى ءبىر جوبا قىزىلجار اۋدانىندا جۇزەگە اسپاق. پەتروپاۆلدا «Dostyk Mall» ساۋدا-ويىن-ساۋىق كەشەنى اشىلادى.

ءبىرىنشى ۆيتسە-پرەمەر وبلىس ورتالىعىنداعى بىرقاتار ونەركاسىپ كەشەندەرىن ارالادى. اسقار مامين زيكستو، پامج جانە كيروۆ اتىنداعى زاۋىتتاردىڭ دامۋ پەرسپەكتيۆاسىمەن تانىستى.

 “The Qazaq Times”