اقش مۇناي ءوندىرىسى الەمدىك نارىققا وزگەرىس اكەلەدى

حالىقارالىق ەنەرگەتيكا اگەنتتىگى 27 اقپاندا مالىمدەمە جاساپ، اقش 2019 جىلعا بارعاندا الەمدەگى ەڭ ءىرى مۇناي ءوندىرۋشى ەل سانالاتىن رەسەيدى باسىپ وزاتىنىن العا تارتتى. حەا-نىڭ مەجەسىنە قاراعاندا، اقش-تىڭ مۇناي وندىرۋدەگى بۇل تىڭ تەبىنى جاھاندىق نارىققا ۇلكەن اسەر ەتەتىنىن ايتتى. بۇل تۋرالى «People» باسىلىمى حابارلادى.

اتالعان مالىمەتتى حالىقارالىق ەنەرگەتيكا اگەنتتىگىنىڭ اتقارۋشى ديرەكتورى توكيودا وتكەن وتىرىستا جاريا ەتتى. ول اقش بيىل بولماسا دا، كەلەسى جىلى رەسەيدىڭ ءىرى مۇناي ءوندىرۋشى ورىنىن يەلەيدى دەپ سەنىم ءبىلدىردى. Reuters اگەنتتىگىنە بەرگەن سۇحباتىندا بيلور: «قۇراما شتاتتاعى مۇناي ءوندىرۋ قارقىنى تۇراقتى تۇردە ارتىپ كەلەدى. كوپ ۇزاماي الەمدەگى ەڭ ءىرى مۇناي ءوندىرۋشى ەل بولاتىنى ءسوزسىز»، – دەگەن.

وتكەن عاسىردىڭ 70-ءشى جىلدارىنان بەرى ەسەپتەگەندە، تەك 2017 جىلىدىڭ سوڭىندا عانا اقش-تىڭ شيكى مۇناي ءوندىرىسى العاش رەت تاۋلىگىنە 10 ميلليون باررەلدەن اسىپ، مۇناي الىبى سانالاتىن ساۋد ارابيانى ارتتا قالدىرعان. اقپان ايىنىڭ باس شەنىندە دە، حەا مالىمدەمە جاساپ، جىل سوڭىنا جەتكەندە اقش-تىڭ مۇناي ءوندىرىسى كۇنىنە 11 ملن باررەلگە جەتەدى. بۇل دەڭگەيدە اقش رەسەيدەن اسىپ تۇسەتىنىن ايتقان. بۇعان قوسا بيلوردىڭ ويىنشا، قۇراما شتاتتىڭ مۇناي وندىرىسىندەگى قارقىنى كەمىندە 4-5 جىل توقتامايدى.

Reuters اگەنتتىگى جاساعان ساراپتامادا، «مۇناي ەكسپورتتاۋشى ەلدەردىڭ ۇيىمى جانە رەسەيدى قامتىعان باسقا ءىرى مۇناي ءوندىرۋشى ەلدەر، ءوز نارىعىن ۇستاپ تۇرۋ ءۇشىن ءوز ونىمدەرىن باقىلاۋدى كۇشەيتۋى كەرەك، سەبەبى، اقش-تىڭ مۇناي وندىرىسىندەگى جاڭا تەبىن الەمدىك مۇناي نارىعىن بۇزادى» دەگەن وي ايتىلعان.

اقش مۇنايى الەمدەگى ەڭ ءىرى جانە تەز ءوسىپ كەلە جاتقان ازيا نارىعىنا ەكسپورتتالادى. ال وندا مۇناي ەكسپورتتاۋشى ەلدەر ۇيىمى مەن رەسەيدىڭ نارىقتىق ۇلەسى بار.

“The Qazaq Times”