بۇۇ قاۋىپسىزدىك كەڭەسى شىعىس گۋتادا 30 كۇن بويى وق اتىسپاۋ تۋرالى رەزوليۋتسياسىن قابىلداعانىنا قاراماستان ءسۇريا اۋە كۇشتەرى ايماقتى بومبالاۋىن توقتاتپاي وتىر. ءتىپتى قاۋىپسىزدىك كەڭەسىنىڭ قاۋلىسى قابىلدانا سالىپ بىرنەشە ساعاتتان كەيىن، ءسۇريا رەجيمىنە قاراستى اۋە كۇشتەرى شىعىس گۋتادا اۋە وپەراتسياسىن جاسادى. ءبىر اپتادان بەرگى اۋە شابۋىلدارىنان جۇزدەگەن تۇرعىن قازا تاپتى.

BBC-ءدىڭ مالىمەتىنە قاراعاندا گەرمانيا مەن فرانتسيا جەكسەنبى كۇنى رەسەيگە ۇسىنىس جاساپ، باشار اساد بيلىگىن شابۋىلدى توقتاتۋعا كوندىرىپ، بۇۇ قاۋلىسىن ورىنداۋعا شاقىردى. قاۋىپسىزدىك كەڭەس بۇل رەزوليۋتسيانى شىعىس گۋتا تۇرعىندارىنا گۋمانيتارلىق كومەك جىبەرىپ، بەيبىت تۇرعىنداردى ايماقتان ەۆاكۋاتسيالاۋ ءۇشىن جاساعان بولاتىن. دەگەنمەن، بۇل قاۋلىعا ءىرى ەكسترەميستىك توپتارعا قارسى ءجۇرىپ جاتقان اسكەري وپەراتسيالار  قامتىلمايدى.

باتىس باق وكىلدەرى، سۇرياداعى اقپارات كوزدەرىنىڭ مالىمەتىنە سۇيەنە وتىرىپ، اۋە شابۋىلى اراسىندا حيميالىق قارۋ دا قولدانىلعان بولۋى مۇمكىن دەپ بولجايدى. اقش پەن ءسۇريا بىرلەسكەن مەديتسينالىق كومەك قىزمەتكەرلەرى گازبەن ۋلانعان 16 ادامنىڭ ەمدەۋ ورتالىعىنا تۇسكەنىن، ولاردىڭ اراسىندا ايەلدەر مەن بالالار دا بار ەكەنىن مالىمدەگەن. بۇعان ۇقساس مالىمەتتى ادام قۇقىقتارىن قورعاۋ ۇيىمى دا بەرىپ وتىر.

بۇعان دەيىن شىعىس گۋتا قاقتىعىسسىز ايماقتار قاتارىنا بولىپ كەلگەن. ءتىپتى، شىعىس گۋتادا قاقتىعىستى بولدىرماۋ شارتىنا سۇرياداعى تاراپتارمەن بىرگە، رەسەي، يران جانە تۇركيا ەلدەرى دە قول قويعان بولاتىن. بىراق بۇل كەلىسىم شىعىس گۋتاعا تىنىشتىق اكەلگەن جوق. بىلتىر جىل سوڭىنان باستاپ وپپوزيتسيالىق كۇشتەردىڭ ۇكىمەتكە قارسى شابۋىلدارى جيىلەي ءتۇستى. سوڭىندا باشار اساد بيلىگى اۋە وپەراتسيالارىن اشىپ، ايماقتى بومبانىڭ استىنان الدى.

جەكسەنبى كۇنگى اۋە شابۋىلى ەڭ سۇراپىل بولىپ، بومبالاۋ كۇنى بويى جالعاسقان. ءبىر كۇننىڭ وزىندە قاشا ادامنىڭ مەرت كەتكەنى انىق ەمەس. انكلاۆتىڭ سولتۇستىك باتىسىندا كوتەرىلىسشىلەر مەن رەجيم كۇشتەرى اراسىندا قاقتىعىس بولعان. دەگەنمەن، ۇكىمەت كۇشتەرى قالاعا كىرە الماعان، انكلاۆ ءالى دە كوتەرىلىسشىلەردىڭ باقىلاۋىندا تۇر.

“The Qazaq Times”