Şığıs Guta. Foto: GETTY IMAGES/BBC.

BWW Qauipsizdik keñesi Şığıs Gutada 30 kün boyı oq atıspau turalı rezolyuciyasın qabıldağanına qaramastan Süriya äue küşteri aymaqtı bombalauın toqtatpay otır. Tipti Qauipsizdik keñesiniñ qaulısı qabıldana salıp birneşe sağattan keyin, Süriya rejimine qarastı äue küşteri Şığıs Gutada äue operaciyasın jasadı. Bir aptadan bergi äue şabuıldarınan jüzdegen twrğın qaza taptı.

BBC-diñ mälimetine qarağanda Germaniya men Franciya jeksenbi küni Reseyge wsınıs jasap, Başar Asad biligin şabuıldı toqtatuğa köndirip, BWW qaulısın orındauğa şaqırdı. Qauipsizdik keñes bwl rezolyuciyanı Şığıs Guta twrğındarına gumanitarlıq kömek jiberip, beybit twrğındardı aymaqtan evakuaciyalau üşin jasağan bolatın. Degenmen, bwl qaulığa iri ekstremistik toptarğa qarsı jürip jatqan äskeri operaciyalar  qamtılmaydı.

Batıs BAQ ökilderi, Süriyadağı aqparat közderiniñ mälimetine süyene otırıp, äue şabuılı arasında himiyalıq qaru da qoldanılğan boluı mümkin dep boljaydı. AQŞ pen Süriya birlesken medicinalıq kömek qızmetkerleri gazben ulanğan 16 adamnıñ emdeu ortalığına tüskenin, olardıñ arasında äyelder men balalar da bar ekenin mälimdegen. Bwğan wqsas mälimetti Adam qwqıqtarın qorğau wyımı da berip otır.

Bwğan deyin Şığıs Guta qaqtığıssız aymaqtar qatarına bolıp kelgen. Tipti, Şığıs Gutada qaqtığıstı boldırmau şartına Süriyadağı taraptarmen birge, Resey, Iran jäne Türkiya elderi de qol qoyğan bolatın. Biraq bwl kelisim Şığıs Gutağa tınıştıq äkelgen joq. Bıltır jıl soñınan bastap oppoziciyalıq küşterdiñ ükimetke qarsı şabuıldarı jiiley tüsti. Soñında Başar Asad biligi äue operaciyaların aşıp, aymaqtı bombanıñ astınan aldı.

Jeksenbi küngi äue şabuılı eñ swrapıl bolıp, bombalau küni boyı jalğasqan. Bir künniñ özinde qaşa adamnıñ mert ketkeni anıq emes. Anklavtıñ soltüstik batısında köterilisşiler men rejim küşteri arasında qaqtığıs bolğan. Degenmen, ükimet küşteri qalağa kire almağan, anklav äli de köterilisşilerdiñ baqılauında twr.

“The Qazaq Times”