قازاقستان مەن وزبەكستان اسكەري-تەحنيكالىق باعىتتا بىرلەسىپ جۇمىس ىستەيتىن بولدى.

اقپان ايىنىڭ 23-ءى كۇنى قازاقستان مەن وزبەكستان اراسىندا اسكەري-تەحنيكالىق بايلانىس ورناتۋعا بايلانىستى كەلىسىم كۇشىنە ەندى. اتالمىش قۇجاتقا قوس تاراپ 2017 جىلدىڭ 16 قىركۇيەگىندە تاشكەنت قالاسىندا قول قويعان.

وزبەكستان سىرتقى ىستەر مينيسترلىگىنىڭ حابارلاۋىنشا، قۇجات كۇشىنە ەنگەن كۇننەن باستاپ، قازاقستان مەن وزبەكستان تەڭ دارەجەدە بارلىق زاڭدىق نورمالاردى ەسكەرە وتىرىپ اسكەري-تەحنيكالىق بايلانىس ورناتاتىن بولادى جانە الداعى ۋاقىتتا اتالمىش سالانى جاڭا دەڭگەيگە كوتەرەدى.

ەستەرىڭىزگە سالايىق، بۇدان بولەك قازاقستان مەن وزبەكستان ساۋدا-ەكونوميكالىق بايلانىستى دا كۇشەيتكەن. بۇل باعىتتا ەكى ەل شەكاراسىنداعى تەكسەرۋ بەكەتتەرى كۇردەلى جوندەۋدەن ءوتىپ، جۇك وتكىزۋ قارقىنى بىرنەشە ەسەگە ارتقان.

جالپى، وزبەكستاندا بيلىك باسىنا شاۆكات ميرزيەەۆ كەلگەلى بەرى رەسمي استانا مەن تاشكەنت اراسىنداعى قارىم-قاتىناس دامۋدىڭ جاڭا دەڭگەيىنە كوتەرىلگەن. بۇعان دالەل نۇرسۇلتان نازارباەۆ پەن شاۆكات ميرزيەەۆتىڭ باستاماسىمەن استانا قالاسىندا ورتالىق ازيا ەلدەرى باسشىلارىنىڭ ءسامميتىنىڭ ءوتۋى مەن ەكى ەل پرەزيدەنتتەرىنىڭ ءجيى كەزدەسۋى.

“The Qazaq Times”