Қазақстан мен Өзбекстан әскери-техникалық бағытта бірлесіп жұмыс істейтін болды.

Ақпан айының 23-і күні Қазақстан мен Өзбекстан арасында әскери-техникалық байланыс орнатуға байланысты келісім күшіне енді. Аталмыш құжатқа қос тарап 2017 жылдың 16 қыркүйегінде Ташкент қаласында қол қойған.

Өзбекстан Сыртқы істер министрлігінің хабарлауынша, құжат күшіне енген күннен бастап, Қазақстан мен Өзбекстан тең дәрежеде барлық заңдық нормаларды ескере отырып әскери-техникалық байланыс орнататын болады және алдағы уақытта аталмыш саланы жаңа деңгейге көтереді.

Естеріңізге салайық, бұдан бөлек Қазақстан мен Өзбекстан сауда-экономикалық байланысты да күшейткен. Бұл бағытта екі ел шекарасындағы тексеру бекеттері күрделі жөндеуден өтіп, жүк өткізу қарқыны бірнеше есеге артқан.

Жалпы, Өзбекстанда билік басына Шавкат Мирзиеев келгелі бері ресми Астана мен Ташкент арасындағы қарым-қатынас дамудың жаңа деңгейіне көтерілген. Бұған дәлел Нұрсұлтан Назарбаев пен Шавкат Мирзиеевтың бастамасымен Астана қаласында Орталық Азия елдері басшыларының саммитінің өтуі мен екі ел президенттерінің жиі кездесуі.

“The Qazaq Times”