شي جينپيڭ (سولدان ءبىرىنشى) مەن ۋاڭ چيشان (وڭدا ءبىرىنشى). فوتو: The New Yprk Times.

قىتاي بيلىگىندەگى جوعارى لاۋازىمدىلار اراسىندا بىرقاتار كادرلىق وزگەرىستەر بولىپ جاتقانى بەلگىلى. قىتاي ۇكىمەتىنىڭ ماڭىزدى تۇلعالارىنىڭ ءبىرى  ۋاڭ چيشاننىڭ (Wang Qishan) ساياسي ساحنادان قايتا بوي كورسەتۋى استە كەزدەيسوق جاعداي ەمەس. قىتاي باسشىسى شي جينپيڭ  ول ءۇشىن قىتاي جەتەكشى پارتياسى ىشىندەگى جوعارى لاۋازىمدىلارىنىڭ قىزمەت مەرزىمىن ءوز بەتىنشە وزگەرتكەن. بۇدان سىرت قىتاي باسشىسى الدا بولاتىن جوعارى حالىقتىڭ كونگرەسس (حالىقتىق قۇرىلتاي) كەزىندە ءوزىنىڭ وكىلەتتى مەرزىمىن ۇزارتۋى مۇمكىن. بۇل تۋرالى 22 اقپان كۇنى NTDTV  اقپاراتتىق سايتى حابارلادى.

گونكونگتەگى Oriental Daily News باسىلىمىنىڭ حابارىنا قاراعاندا، ۋاڭ چيشاننىڭ ناقتى قانداي مىندەتكە تاعايىندالاتىنى  الداعى ايدا بەلگىلى بولاتىنىن ايتقان. شەتەلدىك باق-تاردىڭ بولجاۋىنشا ۋاڭ چيشان قىتاي باسشىسىنىڭ ورىنباسارى بولۋى دا بەك مۇمكىن. وعان قوسا قىتاي-اقش قاتىناسىن رەتتەۋ جانە «ۇلكەن قىتاي» ماسەلەسىن ورنىقتىرۋ سەكىلدى قحر-نىڭ نەگىزگى مۇددەلەرىنە ساياتىن مىندەتتەردى جۇكتەمەك.

اقپاننىڭ باس شەنىندە RFA-نىڭ بۇل جونىندەگى حابارىندا: «ۋاڭ چيشان لاۋازىمدى مىندەتكە قايتا تاعايىندالدى، ءىس جۇزىندە ونىڭ بيلىگى قىتايدىڭ وزگە ءمانساپتىلارىنان الدەقايدا جوعارى. بۇنىڭ ءوزى بەيجىڭ بيلىگىنىڭ شي مەن ۋاڭنىڭ ۋىسىندا تۇرعانىن كورسەتەدى»، – دەلىنگەن.  بۇدان تىس، RFA ۋاڭ چيشاننىڭ قايتا تاعايىندالۋى شي جينپيڭنىڭ شەكسىز بيلىك قۇرۋىنا باستاماشىلىق ءرول اتقاردى دەگەن كوزقاراس ايتادى.

دەگەنمەن، ۋاڭ چيشاننىڭ مەملەكەتتىك باسقارۋ ىستەرىندە قايتا بوي كورسەتۋىنە بايلانىستى قىتايدىڭ ءىشى-سىرتىنداعى اقپارات كوزدەرى ءار ءتۇرلى بولجام ايتادى. اراسىندا، ونىڭ ماڭىزدى بيلىك جۇرگىزە الاتىنىن جوققا شىعاراتىن كوزقاراستار دا بار. ال قحر توراعاسىنىڭ وكىلەتتىلىك مەرزىمىن ۇزارتۋى تۋرالى شەتەل ساراپشىلارى: «بۇل قىتاي بيلىگىنىڭ شي ءجينپيڭدى ماقساتتى تۇردە شەكسىز بيلىك قۇرۋشى رەتىندە كورسەتىپ وتىرعانى»، – دەگەن پىكىر ايتادى.

“The Qazaq Times”