قازاقستان كەز كەلگەن ۋاقىتتا بۇۇ-نىڭ بىتىمگەرلىك وپەراتسيالارىنا بارۋعا دايىن 170 ادامنان قۇرالعان كونتينگەنت دايىندادى - دەپ حابارلايدى بۇۇ جاڭالىقتار قىزمەتى.

قازاقستان قورعانىس مينيسترلىگىنىڭ بىرىككەن ۇلتتار ۇيىمىنداعى توراعاسى ەرلان اقىلباەۆ بۇۇ جاڭالىقتار قىزمەتىنە سۇحبات بەرگەن. وندا ول: «ءبىز ءوزىمىزدىڭ بىتىمگەرلىك باعىتتاعى جۇمىسىمىزدىڭ اۋقىمىن كەڭەيتكىمىز كەلەدى. قازىرگى تاڭدا بۇۇ-نىڭ بىتىمگەرشىلىك دەپارتامەنتىمەن وسى باعىت بويىنشا دايىندىق جۇمىستارى جۇرگىزىلۋدە. ءبىز ءوزىمىزدىڭ 170 ادامنان قۇرالعان كونتينگەنتىمىزدى بىتىمگەرلىك وپەراتسيالارعا قاتىستىرماقپىز. بۇل باعىتتا دا قازىر كەلىسسوزدەر جۇرگىزىلۋدە» - دەگەن.

وسى ۋاقىتقا دەيىن قازاقستاندىق وفيتسەرلەر بىرىككەن ۇلتتار ۇيىمىنىڭ يراك، باتىس ساحارا، كوت د يۆۋار ەلدەرىندەگى بىتىمگەرلىك وپەراتسيالارىنا قاتىسقان. يراك اۋماعىندا "قازبات" اسكەري كونتينگەنتى ۇزاق جىلدار بويى قىزمەت اتقارعان.

“The Qazaq Times”