اقش ءسۇريانىڭ ۇكىمەت كۇشتەرىنە سوققى بەرۋى مۇمكىن

اقش ءسۇريانىڭ ۇكىمەت كۇشتەرىنە سوققى بەرۋى مۇمكىن. بۇل تۋرالى وسى ەلدىڭ بۇۇ-داعى تۇراقتى وكىلى نيككي حەيلي مالىمدەدى، دەپ حابارلايدى 24.kz اقپارات اگەنتتىگى.

رەسمي وكىلدىڭ ايتۋىنشا، ەگەر سۇريالىق اسكەريلەردىڭ بەيبىت تۇرعىندارعا حيميالىق قارۋ قولدانعانى دالەلدەنسە، ۋاشينگتون 2017 جىلدىڭ ءساۋىر ايىنداعىداي قادامعا باراتىن بولادى.

بۇدان بۇرىن، قاڭتار ايىندا اقش مەملەكەتتىك دەپارتامەنتىنىڭ باسشىسى رەكس تيللەرسون ءسۇريا اسكەرىنىڭ شىعىس گۋتادا حيميالىق قارۋ قولدانعانى تۋرالى مالىمدەگەن. بىراق رەسەي ونىڭ نەگىزسىز ەكەنىن ايتىپ، ايىپتاعان. ال اقش باستاعان وداقتاس ەلدەر يراك پەن سۇرياداعى لاڭكەستەرگە قارسى «تاباندى باتىلدىق» وپەراتسياسى باستالعالى بەرى اۋە سوققىلارىنان 850-گە جۋىق تۇرعىننىڭ قازا تاپقانىن راستادى. تاعى 500-گە جۋىق ادامنىڭ قازاسى تەكسەرىلىپ جاتىر. ايتا كەتۋ كەرەك، وداقتاس ەلدەر بۇل وپەراتسيانى 2014 جىلدىڭ تامىز ايىندا باستاعان بولاتىن.

“The Qazaq Times”