فوتو: euronews.com

كومىرگە تاۋەلدى پولشا ەو-نىڭ اۋانى لاستاماۋعا قاتىستى تالاپتارىن بۇزعانىن رەسمي تۇردە حابارلادى، - دەپ مالىمدەيدى Euronews اقپارات اگەنتتىگى.

ەو جوعارعى سوتى پولشانىڭ اۋا ساپاسىنا قاتىستى cتاندارتتاردى ساقتاماعانىن حابارلادى. جوعارعى سوت مالىمەتىنشە، پولشا اۋانى لاستاۋعا قاتىستى زاڭدى بۇزىپ، اۋاداعى رۇسات ەتىلگەن قاتتى زاتتاردىڭ جىلدىق كولەمىن اسىرىپ جىبەرگەن (دەمالۋ كەزىندە كەيبىر ورگاندارعا زيانىن تيگىزۋى مۇمكىن).

جەرگىلىكتى حالىقتىڭ ايتۋىنشا، ونىڭ باستى سەبەبى تۇرعىنداردىڭ كومىردى كوپ جاعۋى.

2016 جىلعى ەسەپتە كورسەتىلگەندەي، بەلحاتۋۆتاعى (Belchatow) كومىر نىسانى اۋانى لاستاۋ دەڭگەيى بويىنشا ەو ايماعىندا ءبىرىنشى ورىن الادى.

وتكەن جىلى ەۋروپا كوميسسياسى لاس اۋا سالدارىنان قايتىس بولعان ادام سانىن ازايتۋ شەڭبەرىندە پولشاعا قاتىستى ءىس قوزعاعان بولاتىن. ال پولشادا لاستانعان اۋادان شامامەن جىلىنا 400 مىڭ ادام قايتىس بولادى.

ۇكىمەتتىك ەمەس ەكولوگيالىق ۇيىم "Client Earth" وكىلى اگنەشكو ۆارسو-بيۋكەنەن (Agnieszka Warso-Buchanan ): "پولشا حالقى ءۇشىن بۇل جاقسى جاڭالىق ەمەس. ءبىز سوتتا جەڭىسكە جەتۋ كەرەكتىگىمىز ازداي، سول لاس اۋامەن ءارى قاراي تىنىستاپ ءجۇرۋىمىز كەرەك. پولشا بيلىك وكىلدەرىنىڭ بۇل قاۋىپكە قاتىستى ارەكەتى تىم باياۋ. الداعى ۋاقىتتا دا ۇكىمەت وسىلاي باياۋ قيمىلدايتىن بولسا، ەو-نىڭ وتە ۇلكەن ايىپپۇلىن تولەۋگە ءماجبۇر بولادى. ەل بيلىگىنە حالقىنىڭ دەنساۋلىعىنان كومىر ارتىق پا ەكەن؟ - ۋاقىت كورسەتەدى", - دەدى.

ۆويكوۆيچ (Wojkowice) قالاسىنىڭ اكىمى توماس شتسەربا (Tomasz Szczerba): "كومىر يندۋسترياسى پولشا تاريحىنىڭ ءبىر بولىگى. مىسالى، مەنىڭ اكەم دە، اتام دا كومىر زاۋىتتارىندا جۇمىس ىستەگەن. ءيا، پولشاداعى كومىر مەن بالامالى ەنەرگيا كوزدەرىنە قاتىستى ماسەلە ۋشىعىپ تۇر. بىراق ونى ءبىر ساتتە شەشۋ دە مۇمكىن ەمەس", - دەدى.

وتكەن ايدا ەو كوميسسياسى گەرمانيا، ۇلىبريتانيانى قوسقاندا 9 ەلگە ەسكەرتۋ جاسادى. بۇل ەلدەر اۋانىڭ لاستانۋىنا قاتىستى ۋاقىتىلى شارالار قولدانباسا ەو ولاردىڭ ۇستىنەن سوتقا ارىزدانۋعا ءماجبۇر بولادى.

بريۋسسەل قازىردىڭ وزىندە اۋانى لاستاۋعا قاتىستى 30-عا جۋىق ءىس قوزعاعان، بىراق ولاردىڭ كوپشىلىگى كەيىنگە قالدىرىلىپ كەلەدى.

“The Qazaq Times”