بۇگىن الماتى ۋنيۆەرسياداسى سالتاناتپەن اشىلادى

بۇگىن ەلىمىز سپورت تاريحىندا تاعى ءبىر جارقىن ءساتتىڭ شىمىلدىعى تۇرىلەدى. ياعني، الماتى قالاسىنداعى «الماتى ارەنا» سپورت سارايىندا XXVIII دۇنيەجۇزىلىك قىسقى ۋنيۆەرسيادانىڭ اشىلۋ سالتاناتى بولادى. ايتا كەتەيىك، «الماتى ارەنا» مۇز سارايى قىسقى ۋنيۆەرسيادا ءۇشىن ارنايى سالىنعان.

اۋقىمدى سپورت مەرەكەسىنىڭ اشىلۋ ءراسىمىن «قازاقستان»، «Kazsport» جانە «حابار» تەلەارنالارى تىكەلەي ەفيردە كورسەتەدى. ترانسلياتسيا استانا ۋاقىتىمەن 18:55-تە باستالادى. ەلىمىزدە تۇڭعىش ءوتىپ وتىرعان ۋنيۆەرسيادا باسەكەسىنە قازاقستاننىڭ 175 سپورتشىسى قاتىسىپ، 12 سپورت تۇرىنەن ەل نامىسىن قورعايدى. شارانىڭ اشىلۋ سالتاناتىنا تەك قازاقستاندىق ونەر جۇلدىزدارى قاتىسادى. سونىمەن قوسا، اشىلۋ سالتاناتىن ۇيىمداستىرۋدىڭ بارلىق دايىندىقتارىنا وتاندىق كومپانيالار قاتىسقان.

بۇگىن ۋنيۆەرسيادا الاۋى الماتىعا قايتا ورالدى. الاۋ 25 قاڭتار كۇنى تۇتاتىلىپ، وبلىستاردى ارالاپ كەتكەن. 22 مىڭ 300 شاقىرىم جول باسىپ، ارايلى قالا الماتىعا جەتكەن الاۋدى شاھار اكىمى باۋىرجان بايبەك باستاپ الىپ ءجۇردى. ەستافەدانى ارى قاراي ەلگە تانىمال سپورتشىلار، ادەبيەت وكىلدەرى، ونەر جۇلدىزدارى بار جيىنى 100 ادام الىپ جۇگىرەدى. ەستافەدا تۇسكى ساعات 14:00 دە توقتايدى.

كەشكە «الماتى ارەنا» مۇز سارايىندا قازاقستاننىڭ 16 قالاسىنان كەلگەن وكىكلدەر ۋنيۆەرسيادانىڭ باستى الاۋىن جاعادى. ەسكە سالا كەتسەك، بۇگىن تەك حوككەيشىلەر ونەر كورسەتەدى. تۇسكە قاراي (12:30) اقش جانە رەسەي ايەلدەر قۇرامالارى تارتىستى باسەكە جاساۋعا دايىندالىپ وتىر. ال، قالعان نەگىزگى جارىستار ەرتەڭ باستالادى.

ءبىز وتانداستارىمىزعا ساتتىلىك تىلەي وتىرىپ، مىنا مالىمەتتى ايتا كەتەيىك. prosports.kz سايتىنىڭ دەرەگىنشە، سوڭعى جىلدارى بۇكىلالەمدىك ۋنيۆەرسيادا ويىندارىندا قازاق ستۋدەنتتەرى تاماشا تابىستارعا قول جەتكىزىپتى. 2015 جىلى سلوۆاكيا مەن يسپانيادا وتكەن قىسقى ويىنداردا ءبىزدىڭ قۇرامانىڭ 5 التىن 6 كۇمىس مەدالمەن كوماندالىق سىندا ۇزدىك ۇشتىكتەن كورىنگەن. قازاقستان ءبىلىم جانە عىلىم مينيسترلىگى بولاشاقتا دا ستۋدەنتتەر سپورتىن دامىتۋ ماقساتىندا كوپتەگەن ءىس-شارالاردى جۇزەگە اسىرۋدا. رەسپۋبليكالىق ۋنيۆەرسيادادا ۇزدىك شىققاندار كەلەر جىلعى بۇكىلالەمدىك ۋنيۆەرسياداعا قاتىسۋعا مۇمكىندىك الادى. ولاي بولسا، جەڭىستى جولدار جالعاسا بەرسىن.

ءدۇبىرلى دودا باستالدى.