مەكتەپ ديرەكتورلارىنىڭ جالاقىسى كوتەرىلۋى مۇمكىن.  قر ءبىلىم جانە عىلىم ۆيتسە-ءمينيسترى اسحات ايماعامبەتوۆ مەكتەپ باسشىلارىنىڭ ەڭبەكاقىسىن سارالاۋ ارقىلى تولەۋ ماسەلەسى قاراستىرىلىپ جاتقانىن مالىمدەدى.

"مۇعالىمدەردىڭ جالاقىسىنا قوسىمشا اقى ايتارلىقتاي ءوستى، بىراق مەكتەپ ديرەكتورى مەن ونىڭ ورىنباسارلارى، وقۋ ءىسىنىڭ مەڭگەرۋشىلەرىنە كەلەر بولساق، ماسەلە بار. مۇنى ءبىز اتتەستاتسيا ارقىلى جۇيەلى تۇردە شەشۋدى قاراستىرىپ وتىرمىز. قازىرگى كەزدە مەكتەپ ديرەكتورلارى ءۇش جىلدا ءبىر رەت ازاماتتىق قىزمەتكەر رەتىندە اتتەستاتسيادان وتەدى. بىراق شاعىن نەمەسە ۇلكەن مەكتەپتىڭ ديرەكتورى جانە مەكتەپتىڭ تولىق بولۋىنا، سونداي-اق ديرەكتوردىڭ قانشالىقتى ءتيىمدى جۇمىس ىستەيتىنىنە قاراماستان ولاردىڭ ەڭبەكاقىسى وسپەگەن. ياعني ۇستەماقى جوق", - دەدى ايماعامبەتوۆ ماجىلىستە الەۋمەتتىك-مادەني دامۋ كوميتەتى مەن "نۇر وتان" پارتياسى فراكتسياسى جانىنداعى الەۋمەتتىك كەڭەستىڭ بىرلەسكەن جيىنىندا.

بۇدان بولەك، مەكتەپ ديرەكتورى مەن ورىنباسارلارىنا جارتى ستاۆكا بويىنشا ساباق بەرۋ مۇمكىندىگىن قايتارىپ بەرۋ ۇسىنىلدى.

ايتا كەتەيىك، بۇدان بۇرىن قر پرەزيدەنتى نۇرسۇلتان نازارباەۆ 2018 جىلدىڭ 1 قاڭتارىنان باستاپ بىلىم بەرۋدىڭ جاڭارتىلعان مازمۇنىنا كوشكەن ۇستازداردىڭ لاۋازىمدىق جالاقىسىن 30 پايىزعا كوبەيتۋدى تاپسىرعان ەدى.

“The Qazaq Times”