فوتو: edu-bko.gov.kz

سقو ءبىلىم باسقارماسىنىڭ كەڭەيتىلگەن القا وتىرىسىندا «ورلەۋ» ورتالىعى فيليالىنىڭ ديرەكتورى الما مىرزالينوۆا وڭىردە ينكليۋزيۆتى ءبىلىم بەرۋدىڭ رەسۋرستىق ورتالىعىن اشۋ جونىندە ۇسىنىس ايتتى، دەپ حابارلايدى وبلىس اكىمدىگىنىڭ ءباسپاسوز قىزمەتى.

ۇسىنعان مالىمەت بويىنشا، وبلىستا قازىر ەرەكشە قاجەتتىلىكتەرى بار 4593 بالا بار، ونىڭ ىشىندە 1471-ءى مۇگەدەك. قازىر مەكتەپتەردە ينكليۋزيۆتى ءبىلىم بەرۋ جۇيەسى بويىنشا 1784 بالا وقىپ جاتىر. بالاباباقشالار مەن شاعىن ورتالىقتارعا 500-گە جۋىق بالا بارىپ ءجۇر. ورتالىقتىڭ باستى ماقساتى – ينكليۋزيۆتى ءبىلىم بەرۋدىڭ تەورياسى مەن تاجىريبەسىن بىرىكتىرە وتىرا، ءار دەڭگەيدە ۇزدىكسىز ساپالى ءبىلىم بەرۋدى قالىپتاستىرۋ بولىپ تابىلادى.

ءوڭىر باسشىسى قۇمار اقساقالوۆ بۇل باستامانى قولدادى.

«ەرەكشە قاجەتتىلىكتەرى بار بالالارعا ارنالعان رەسۋرستىق ورتالىعىن اشۋ وتە ورىندى ۇسىنىس. ءبىز قولداۋعا دايىنبىز»، - دەدى قۇمار اقساقالوۆ.

ينكليۋزيۆتى ءبىلىم بەرۋ   – ەرەكشە ءبىلىم بەرۋ قاجەتتىلىكتەرىن جانە جەكە مۇمكىندىكتەرىن ەسكەرە وتىرىپ،  بارلىق ءبىلىم الۋشىلاردىڭ بىلىمگە تەڭ قول جەتكىزۋىن قامتاماسىز ەتەتىن ۇدەرىس.مەملەكەت ينكليۋزيۆتى ءبىلىم بەرۋدىڭ ماقساتىن ىسكە اسىرا وتىرىپ، ءبىلىم بەرۋدىڭ بارلىق دەڭگەيىندە دامۋ مۇمكىندىكتەرى شەكتەۋلى ازاماتتارعا ولاردىڭ ءبىلىم الۋىنا، دامۋىنداعى اۋىتقۋدى تۇزەتۋىنە جانە الەۋمەتتىك بەيىمدەلۋىنە ارنايى جاعدايلار جاساۋدى قامتاماسىز ەتەدى. ينكليۋزيۆتى ءبىلىم بەرۋ ءار بالاعا ونىڭ مۇقتاجدىعىنا جانە باسقا ءمان - جايلارعا بايلانىسسىز، ءوز الەۋەتىن جانە ءبىلىم الۋ عاقۇقىعىن  ىسكە اسىرۋعا مۇمكىندىك بەرەدى.

“The Qazaq Times”