قازاقستان كومىرىن ەڭ كوپ ساتىپ العان ەل - رەسەي

2017 جىلدىڭ قاڭتار-قاراشا ايىندا قازاقستان شەتەلگە 407,8 ملن دوللارعا 24,5 ملن توننا تاس كومىر ەكسپورتتاعان. 

ستاتيستيكا كوميتەتىنىڭ مالىمەتىنشە، شيكىزات تاسىمالى 2016 جىلدىڭ 11 ايىمەن سالىستىرعاندا 14 پايىزعا، ال قاراجات كولەمى بىردەن 56 پايىزعا ارتقان.

قازاقستان كومىرىنىڭ ەڭ كوپ بولىگىن ساتىپ العان ەل رەسەي. بۇل ەلگە 235,2 ملن دوللارعا 18,8 ملن توننا كومىر جەتكىزىلگەن. كورسەتكىش 2016 جىلعا قاراعاندا 8,4 پايىزعا جوعارى. بۇدان بولەك، 3,2 ملن توننا كومىر(48,4 ملن دوللار) فينلياندياعا، 903,6 مىڭ توننا (14,7 ملن دوللار) قىرعىزستانعا، 673,4 مىڭ توننا (43,3 ملن دوللار) شۆەيتسارياعا ساتىلعان.

ۋكرايناعا جەتكىزىلگەن تاس كومىر كولەمى 369,8 مىڭ توننا (50,6 ملن دوللار) بولسا، كيپرعا 157 مىڭ توننا (9,6 ملن دوللار) جەتكىزىلگەن.

كوميتەت مالىمەتىنشە، 2017 جىلى قازاقستاندىق 13 كاسىپورىن 280,8 ملرد تەڭگەنىڭ تاس  كومىرى مەن ليگنيتىن وندىرگەن جانە بۇل 2016 جىلدىڭ سايكەس كەزەڭىنە قاراعاندا 6 پايىزعا جوعارى. سونداي-اق، ءوندىرىس كولەمى 106,7 ملن توننانى قۇراپ، ءبىر جىلدا 8,3 پايىزعا وسكەن.

دەگەنمەن ەلدەگى سوڭعى ۋاقىتتاعى كومىر تاپشىلىعى حالىقتىڭ نارازىلىعىن تۋدىرىپ وتىر. ءوندىرىس كولەمى ارتتى دەگەن كۇننىڭ وزىندە، ەلدەگى تاپشىلىق بۇل ستاتيستيكاعا قايشى كەلىپ وتىر.

“The Qazaq Times”