ليۆيا جاعالاۋىنان اشىق تەڭىزگە شىققان جولاۋشى قايىعى اۋدارىلىپ، 90 ميگرانت سۋ استىندا قالدى. ءتىرى قالعان ءۇش ادام جولاۋشىلاردىڭ نەگىزگى دەنى پاكىستان ازاماتتارى مەن ليۆيالىقتار بولعانىن ايتقان. ليۆيا ەۋروپاعا جەتۋدى كوزدەگەن ميگرانتتار ءۇشىن نەگىزگى ترانزيتتىك مەملەكەت بولىپ وتىر. وتكەن جىلى ەۋروپا ەلدەرى ليۆيانىڭ شەكارا كۇزەتىمەن كەلىسىپ، ولارعا ميگرانتتاردى ۇستاپ، كەيىن قايتارۋدى تاپسىرعان بولاتىن. ويتكەنى ەۋرووداق مەملەكەتتەرىنىڭ بىرقاتارى وزدەرىنە بولىنگەن كۆوتالارعا سايكەس،  بوسقىنداردى قابىلداۋدان باس تارتىپ وتىر. بۇل تۋرالى ۆۆس اقپاراتتىق اگەنتتىگى جازدى. 

بۇۇ مەن حالىقارالىق ۇيىمدار ليۆيا شەكارا كۇزەتىنىڭ ميگرانتتاردى توقتاتۋداعى اسقان زۇلىمدىعىن العا تارتىپ، ەۋروپا مەملەكەتتەرىن قابىلداعان شەشىمى ءۇشىن ايىپتاعان ەدى. دەگەنمەن ميگراتسيا جونىندەگى حالىقارالىق ۇيىم ميگرانتتار قايىعىنىڭ تەڭىزدە اۋدارىلۋ وقيعاسى سوڭعى كەزدە ءجيى ورىن العانىن ايتادى.

قايىقتا بولعان توقسان ادامنىڭ تەگى مەن ۇلتى ءالى انىقتالعان جوق. بىراق وقيعا كۋاگەرلەرىنىڭ ايتۋىنشا، قايىقتاعىلاردىڭ باسىم بولىگى - پاكىستاندىق ازاماتتار. ميگراتسيا جونىندەگى حالىقارالىق ۇيىمنىڭ مالىمدەمەسىندە: "ەۋروپاعا باعىت العان ميگرانتتاردىڭ سانى جونىنەن پاكىستان وتكەن جىلى 13-ءشى ورىندا بولسا، بيىل العاشقى ۇشتىكتە تۇر" دەلىنگەن.

 “The Qazaq Times”