![](https://qazaqtimes.com/kk/content/uploads/2018/01/bca3ceb26b0694a6ef22ddc2e21ab0cb-800x480.jpg?token=c9b21e36be487a2d09bfec7f0aa5ca8e)
بۇگىن قر پرەزيدەنتى نۇرسۇلتان نازارباەۆ پرەمەر-ءمينيستردىڭ ورىنباسارى اسقار جۇماعاليەۆتى قابىلدادى. كەزدەسۋدە مەملەكەت باسشىسىنا "تسيفرلىق قازاقستان" مەملەكەتتىك باعدارلاماسىنىڭ ىسكە اسىرىلۋ بارىسى جانە بۇعان دەيىن بەرىلگەن تاپسىرمالاردى ورىنداۋ ءۇشىن اتقارىلعان شارالار جونىندە باياندالدى، دەپ حابارلايدى اقوردانىڭ رەسمي سايتى.
"تسيفرلاندىرۋدىڭ ارقاسىندا قازاقستان ەكونوميكاسى 30 پايىزعا ءوسۋى كەرەك، ول اقشاعا شاققاندا 2 تريلليون تەڭگەدەن اسادى", – دەدى پرەزيدەنت.
نۇرسۇلتان نازارباەۆ قازاقستاندا جيناقتالعان تاجىريبە مەن قۇزىرەتتىلىكتى ساقتاۋ ءۇشىن تسيفرلاندىرۋ سالاسىنداعى مەملەكەتتىك تاپسىرىستاردى جۇزەگە اسىرۋ ماسەلەلەرىن سارالاۋعا وتاندىق بيزنەستىڭ قاتىسۋى قاجەت ەكەنىن اتاپ ءوتتى.
"تسيفرلاندىرۋ باعدارلاماسى بەكىتىلدى. مەملەكەت وعان از اقشا ءبولىپ وتىرعان جوق، سوندىقتان ولاردىڭ ءتيىمدى پايدالانىلۋىن قامتاماسىز ەتۋ كەرەك", – دەدى نازارباەۆ.
اسقار جۇماعاليەۆ قازاقستان پرەزيدەنتىنە «تسيفرلىق قازاقستان» باعدارلاماسىنىڭ ورىندالۋىنان كۇتىلەتىن ناتيجەلەر جونىندە مالىمدەدى.
"تسيفرلاندىرۋدى ەنگىزۋدىڭ ارقاسىندا ءوندىرۋشى ونەركاسىپتە ءونىمنىڭ وزىندىك قۇنى تومەندەپ، ءوندىرىس كولەمى ۇلعايادى. سونداي-اق، ەلەكتروندى كوممەرتسيا سالاسىندا 200 مىڭعا جۋىق جاڭا جۇمىس ورنى اشىلادى دەپ وتىرمىز. ءبىزدىڭ ەسەبىمىز بويىنشا، تەك كەدەن جانە سالىق قىزمەتتەرىن تسيفرلاندىرۋ ناتيجەسىندە مەملەكەت قازىناسىنا 100 ميلليارد تەڭگەدەن استام قارجى تۇسەدى", – دەدى پرەمەر-ءمينيستردىڭ ورىنباسارى.