رەجەپ تايىپ ەردوعان مەن ۆلاديمير پۋتين تەلەفون ارقىلى سويلەستى

تۇركيا پرەزيدەنتى رەجەپ تايىپ ەردوعان مەن رەسەي باسشىسى ۆلاديمير پۋتين ءسۇريا ماسەلەسىن تالقىلادى – دەپ حابارلايدى Anadolu اقپارات اگەنتتىگى.

اگەنتتىك مالىمەتىنشە، 24 قاڭتار كۇنى رەجەپ تايىپ ەردوعان مەن ۆلاديمير پۋتين تەلەفون ارقىلى تۇركيا ارمياسىنىڭ سۇرياداعى اسكەري وپەراتسياسى جونىندە سويلەسكەن. سويلەسۋ بارىسىندا ۆلاديمير پۋتين رەسمي انكارانىڭ ءسۇريا اۋماعىندا جۇرگىزىپ جاتقان اسكەري وپەراتسياسىنىڭ ماڭىزى زور ەكەندىگىن تىلگە تيەك ەتكەن. بۇدان بولەك ەكى ەل باسشىلارى الداعى ۋاقىتتا ءسۇريا داعدارىسىن شەشۋدە بىرلەسىپ جۇمىس ىستەۋگە ۋاعدالاسقان.

ەستەرىڭىزگە سالايىق، قاڭتار ايىنىڭ 20-سى كۇنى تۇركيا ءسۇريانىڭ افرين اۋماعىنا اسكەر كىرگىزگەن بولاتىن. كەيىننەن باق بەتتەرىندە «افرين اۋماعىنداعى رەسەي اسكەرى تۇركيا ارمياسىنىڭ شابۋىلىنان كەيىن كەرى شەگىندى» دەگەن اقپارات تاراعان. بىراق رەسەي سىرتقى ىستەر ءمينيسترى سەرگەي لاۆروۆ اتالمىش اقپاراتتى جوققا شىعارعان. ال تۇركيا پرەزيدەنتى رەجەپ تايىپ ەردوعان: «ءبىز بۇل وپەراتسيا تۋرالى رەسەيلىك دوستارىمىزبەن اقىلداسقانبىز. ءبىزدىڭ كەلىسىمدەرىمىز بار» - دەپ مالىمدەگەن.

“The Qazaq Times”