وزبەكستان، قىرعىزستان جانە قىتاي تاشكەنتتە قاڭتار ايىنىڭ 24-ءى مەن 25-ءسى ارالىعىندا تاشكەنت-ءاندىجان-وش-يركەشتام-قاشقار تاس جولىن سالۋعا بايلانىستى كەزدەسۋ وتكىزەدى – دەپ حابارلايدى وزبەكستان سىرتقى ىستەر مينيسترلىگى ءباسپاسوز قىزمەتى.

وزبەكستان سىرتقى ىستەر مينيسترلىگى تاراتقان مالىمەت بويىنشا، تاشكەنت قالاسىندا وتەتىن ءۇش جاقتى كەزدەسۋگە قىتاي حالىق رەسپۋبليكاسىنىڭ كولىك مينيسترلىگى، قىرعىزستان رەسپۋبليكاسىنىڭ كولىك جانە جول مينيسترلىگى مەن وزبەكستان رەسپۋبليكاسىنىڭ اۆتوكولىك جانە وزەن كولىگى اگەنتتىگى وكىلدەرى قاتىسادى دەپ كۇتىلۋدە. سونىمەن قاتار، ءۇش جاقتى كەزدەسۋ قارساڭىندا حالىقارالىق اۆتوموبيل تاسىمالى بويىنشا، ەكى جاقتى وزبەك-قىرعىز جانە وزبەك-قىتاي كەزدەسۋلەرىن وتكىزۋ جوسپارلانۋدا.

ەگەر اتالمىش كەزدەسۋلەر ناتيجەلى اياقتالاتىن بولسا، وندا وزبەكستان - قىرعىزستان - قىتاي باعىتىنداعى تەمىر جول تورابى الەم بويىنشا ەڭ بيىك تاۋ جولى بولادى. ونىڭ كەيبىر بولىكتەرى تەڭىز دەڭگەيىنەن 4400 مەتر بيىكتىكتە ورنالاسادى جانە جالپى ۇزىندىعى 11 كيلومەتردەن استام تۋننەلدەر ارقىلى وتەدى. بولاشاقتا وزبەكستان –قىرعىزستان – قىتاي باعىتىنداعى تەمىر جول قازاقستان ارقىلى وتەتىن دوستىق – الاتاۋ (الاشانكۋ) تەمىر جول تورابى مەن ءترانسسىبىر ماگيسترالىنا باسەكەلەس بولماق.

“The Qazaq Times”