اسقار مامين بايقوڭىر مەن قىزىلوردانىڭ الەۋمەتتىك جانە ونەركاسىپ نىساندارىن ارالادى

ا. مامين «بايتەرەك» قازاقستاندىق-رەسەيلىك جوباسىن ىسكە اسىرۋ بارىسى تۋرالى ەسەپتى تىڭدادى، ونىڭ اياسىندا بايقوڭىر عارىش ايلاعىنداعى جەردەگى عارىش ينفراقۇرىلىمىن جاڭعىرتۋ جوسپارلانعان. اتاپ ايتقاندا، «زەنيت» عارىش زىمىران كەشەنىن. سونداي-اق، «بايقوڭىر» كەشەنى نىساندارىن پايدالانۋعا قاتىستى جۇمىستاردى اتقارۋ جايى باياندالدى، دەپ حابارلايدى «www.primeminister.kz» قازاقستان رەسپۋبليكاسىنىڭ پرەمەر-ءمينيسترىنىڭ رەسمي سايتى.

2016 جىلعى جەلتوقساندا قر پرەزيدەنتى نۇرسۇلتان نازارباەۆتىڭ رەسەيگە جۇمىس ساپارى بارىسىندا كەلەسى قۇجاتتارعا قول قويىلعان بولاتىن: «بايقوڭىر» كەشەنىندەگى الداعى ىنتىماقتاستىق تۇجىرىمداماسى جانە «1995 جىلعى 23 جەلتوقسانداعى بايقوڭىر قالاسىنىڭ مارتەبەسى جانە ونداعى اتقارۋشى وكىمەت ورگاندارىن قۇرۋدىڭ ءتارتىبى مەن ولاردىڭ مارتەبەسى تۋرالى مەملەكەتارالىق كەلىسىمگە قر مەملەكەتتىك ورگاندارىنىڭ ءتىزىمى بولىگىنە وزگەرىستەر ەنگىزۋ تۋرالى» حاتتاما.

«تۇجىرىمدامانى ورىنداۋ «بايقوڭىر» كەشەنىن دامىتۋ بويىنشا قازاقستان مەن رەسەي ىنتىماقتاستىعىنىڭ باسىمدىقتى باعىتتارىن ەكى مەملەكەتتىڭ مۇددەلەرىنە ساي جۇزەگە اسىرۋعا مۇمكىندىك بەرەدى، كەشەننىڭ ودان ءارى دامۋىن پەرسپەكتيۆالى جوسپارلاۋدى قامتاماسىز ەتەدى، سونداي-اق جاڭا ورتاق عارىشتىق جوبالاردى ىسكە اسىرۋعا مۇمكىندىك بەرەدى»، – دەپ باسا ايتتى ا. مامين.

قىزىلورداعا جۇمىس ساپارى اياسىندا قر پرەمەر-ءمينيسترىنىڭ ءبىرىنشى ورىنباسارى «نۇر وردا» جاڭا شاعىن اۋدانىندا بولىپ قايتتى. مۇندا وڭىردەگى تۇرعىن ءۇي قۇرىلىسىنىڭ بارىسى تۋرالى ەسەپ بەرىلدى. «وڭىرلەردى دامىتۋدىڭ 2020 جىلعا دەيىنگى» باعدارلاماسى بويىنشا اتالعان شاعىن اۋداندا 20 كوپقاباتتى ءۇي تۇرعىزىلعان.

ا. مامين ءوڭىردىڭ باستى جىلۋمەن قامتۋ نىسانى – قىزىلوردا جەو-نىڭ جۇمىسىمەن تانىسىپ، اتالعان نىساندى جاڭعىرتۋعا بايلانىستى باياندامانى تىڭدادى.

سونداي-اق، قازاقستانداعى العاشقى تاباق شىنى وندىرەتىن زاۋىتتىڭ قۇرىلىس الاڭىنا باردى. كاسىپورىن بيىلعى جىلدىڭ ەكىنشى توقسانىندا پايدالانۋعا بەرىلەتىن بولادى. مۇندا جىلىنا 200 مىڭ توننا تاباق شىنى، ەنەرگيا ۇنەمدەۋشى، كۇننەن قورعايتىن جانە كوپفۋنكتسيالى شىنى شىعارۋ جوسپاردا بار.

سونداي-اق، ا. مامين سىرداريا وزەنىنىڭ سول جاعالاۋىنداعى جاڭا كوپىردى قاراپ شىعىپ، سول جاق جاعالاۋ ايماعىنىڭ قۇرىلىس جوباسىمەن تانىستى.

جۇمىس ساپارىنىڭ قورىتىندىسى بويىنشا قر پرەمەر-ءمينيسترىنىڭ ءبىرىنشى ورىنباسارى قىزىلوردا وبلىسىن دامىتۋ ماسەلەلەرى جونىندە كەڭەس وتكىزدى. كەڭەس بارىسىندا ءوڭىر اكىمى ق. كوشەرباەۆ بايانداما جاسادى. ول 2016 جىلداعى ءوڭىردىڭ الەۋمەتتىك-ەكونوميكالىق دامۋ قورىتىندىلارى مەن 2017 جىلى وبلىستى دامىتۋ پەرسپەكتيۆالارى تۋرالى ەسەپ بەردى.

"The Qazaq Times"