ءۇندىستان شەكاراشىلارى. فوتو: شينلاڭ.

ءۇندىستان اقپارات قۇرالدارىنىڭ حابارىنا قاراعاندا، سول جەردىڭ جەرگىلىكتى ۋاقىتىمەن 17 قاڭتار كۇنى كەشكە جاقىن، كاشميردە ءۇندىستان مەن پاكىستاننىڭ شەكارا جاساقتارى اراسىندا قاقتىعىس بولعان. كەزەكتەسكەن قارۋلى شابۋىلدار 18 قاڭتاردىڭ تاڭىنا دەيىن جالعاسقان، ەكى جاقتان دا ادام ءولىمى بولعان. بۇل تۋرالى «شينلاڭ» اقپاراتتىق سايتى حابارلادى.

«ءۇندى ەكسپرەسس» باسىلىمى بۇل وقيعا تۋرالى حابارلاعاندا «ءۇشىنشى دۇنيە سوعىسى» دەپ اتاپتى. كەشكى ساعات 21:00 شاماسىندا باستالعان ۇرىس بىرنەشە ساعاتقا دەيىن سۇراپىل جالعاسىپ، 18 قاڭتاردىڭ تاڭىنا دەيىن تولاستاماعان. ءۇندىستان اقپارات قۇرالدارىنىڭ كورسەتۋىنشە، پاكىستان قارۋلى كۇشتەرى ءۇندىستان باقىلاۋىنداعى بىرنەشە اۋىلداردى باسىپ العان، كەيىن ءۇندى قارۋلى كۇشتەرى ارتيللەريالىق سوققى جاساعان. قاقتىعىس كەزىندە ءۇندىستاننىڭ شەكارا كۇشتەرى جوعارى قولباسشىلارىنىڭ ءبىرى قازا تاپقان.

ال، پاكىستان باق وكىلدەرىنىڭ قارۋلى كۇشتەرگە سىلتەمە جاساي وتىرىپ حابارلاۋىنا قاراعاندا،  ۇندىستان جاقتىڭ ارتيللەريالىق شابۋىلىنان پاكىستان تارابىنان 3 ايەلدى قامتىعان 5 جازىقسىز تۇرعىن قازا بولعان. قاقتىعىستان سوڭ كاشميردەگى مەكتەپتەر ساباق توقتاتقان. بىراق اۋقىمدى ەۆاكۋاتسيالاۋ ارەكەتى بولماعان.

وسىدان بىرنەشە كۇن بۇرىن دا، ياعني 15 قاڭتاردا ەكى ەل شەكاراشىلارى اراسىندا ۇرىس بولعان ەدى. مالىمەتتەرگە قاراعاندا 7 ادام قازا تاۋىپ، 4 ادام جاراقات العان. الايدا، پاكىستان قورعانىس تاراۋلارى مالىمەتىندە سول رەتكى قاقتىعىستا پاكىستان جاق باسىمدىقتى يەلەگەن دەلىنگەن. ءۇندىستاننىڭ قارۋلى توبىنا سوققى بەرگەندەرىن ايتىپ، قاقتىعىستا پاكىستان جاقتان 4 ادام، ءۇندىستان اسكەرلەرىنەن 3 ادام قازا تاپقانىن، ودان وزگە جارالانعاندار دا بار ەكەنىن حابارلاعان.

كەزەكتى قاقتىعىس ەكى ەل ارسىنداعى سوڭعى بىرنەشە جىلداعى ەڭ كۇشتى قارۋلى ۇرىس بولدى.

“The Qazaq Times”