ۋاشينگتون اقش، قازاقستان، قىرعىزستان، تاجىكستان، تۇرىكمەنستان جانە وزبەكستاندى قامتيتىن «C5+1» سەرىكتەستىگىن تەرىس پيعىلدارعا پايدالانۋى مۇمكىن – دەپ مالىمدەدى رەسەي سىرتقى ىستەر ءمينيسترى سەرگەي لاۆروۆ.

قاڭتار ايىنىڭ 15-ءسى كۇنى رەسەي سىرتقى ىستەر ءمينيسترى سەرگەي لاۆروۆ "2017 جىلداعى رف-نىڭ ديپلوماتيالىق ناتيجەلەرى" اتتى ءباسپاسوز ءماسليحاتىندا «س5+1» ارىپتەستىگى جونىندە پىكىر بىلدىرگەن. ول وندا: «ءبىز ورتالىق ازياداعى كورشىلەرىمىزدىڭ كەڭ اۋقىمدى سىرتقى ساياسات ۇستانعانىنا قارسى ەمەسپىز. بىراق ءبىز اقش-تىڭ اتالمىش ارىپتەستىكتى تەرىس پيعىلدا پايدالانعىسى كەلگەنىن ەستىدىك. بۇل بۇعان دەيىن دە ايتىلعان «ۇلكەن ورتالىق ازيا» جوباسىنا ۇقساس دۇنيە. ەگەر ءبىزدىڭ امەريكالىق ارىپتەستەرىمىز ءبىزدىڭ ورتالىق ازيالىق دوستارىمىزبەن كەزدەسۋىندە ەكونوميكا ەمەس گەوساياسات تۇرعىسىندا كەلىسسودەر جۇرگىزەتىن بولسا، وندا ولاردىڭ بارلىعى بۇنىڭ جاقسىلىققا اپارمايتىنىن كورەتىن بولادى. ءبىزدىڭ «ۇلكەن ەۋرازيا» جوبامىز اتالمىش يدەولوگياعا كەرەعار. ونىڭ نەگىزىندە اشىقتىق پەن بىرتىندەپ بىرىگۋ يدەياسى جاتىر. وسىنىڭ ناتيجەسىندە ءبىز بۇكىل ەۋرازيا قۇرلىعىن بىرىكتىرمەكپىز» - دەگەن.

ەستەرىڭىزگە سالايىق، بۇعان دەيىن اقش مەملەكەتتىك حاتشىسىنىڭ وڭتۇستىك جانە ورتالىق ازيا بيۋروسىنىڭ ءبىرىنشى ورىنباسارى ەليس ۋەللس ۋاشينگتوننىڭ ورتالىق ازيا ەلدەرىنىڭ سىرتقى ىستەر مينيسترلەرىمەن ايماقتاعى ەلدەردىڭ بىرىندە «س5+1» فورماتىندا كەزدەسۋ وتكىزۋ جوسپارى بار ەكەندىگىن مالىمدەگەن.

“The Qazaq Times”