فوتو: tvcnews.tv

مولدوۆالىق بيزنەسمەن اناتولي ستاتي قازاقستاننان 167 ملن دوللار الىپ كەتكەن. بۇل قاراجات ەلدىڭ باتىسىندا گاز ءوندىرۋ زاۋىتىنىڭ قۇرىلىسىنا جۇمسالۋى ءتيىس بولعان. بۇل تۋرالى قر ادىلەت ءمينيسترى مارات بەكەتاەۆ مالىمدەدى.

ءمينيستردىڭ سوزىنشە، ستاتي قازاقستاندا جۇمىس ىستەپ جۇرگەن كەزدە وبليگاتسيالاردى ورنالاستىرعان، ال الىنعان قارجى گاز وڭدەۋ زاۋىتىنىڭ قۇرىلىسىنا جۇمسالۋ كەرەك بولعان.

"بۇل ءۇشىن ول نەمىس جانە اعىلشىن كومپانياسىن جالداعان. اعىلشىن كومپانياسىنىڭ اتى - Perkwood. ءبىز انگليانىڭ رەسمي دەرەككوزدەرىنەن اقپاراتتى سۇراستىردىق جانە قارادىق. بىلگەنىمىزدەي، بۇل كومپانيا ءستاتيدىڭ كومپانياسى اتىنان بىرنەشە ون ميللوون دوللار قارجى الىپ وتىرعان. انگليادا نولدىك ەسەپ تاپسىرعان جانە بىرنەشە جىل جۇمىس ىستەگەن. سودان ءبىز لاتۆياعا ساۋال جىبەردىك. بۇل كومپانيانىڭ لاتۆيالىق بانكتەگى شوتىنا گاز وڭدەۋ زاۋىتىنىڭ قۇرىلىسى ءۇشىن اقشا اۋدارىلعان. لاتۆيانىڭ قۇقىق قورعاۋ ورگاندارىنىڭ جاۋابى بويىنشا بانكتەگى شوت اناتولي ءستاتيدىڭ اتىنداعى سەنىمحات ارقىلى اشىلعان", - دەدى بەكەتاەۆ.

بىراق ءمينيستردىڭ ايتۋىنشا، زاۋىت ءالى جۇمىس ىستەمەيدى، ءتىپتى سالىنباعان. ال ءستاتيدىڭ الاياقتىعى جونىندەگى دالەلىن قازاقستان كەشىگىپ العاندىقتان ونى ستوكگولم سوتى قابىلداماعان. 2013 جىلى سوت قازاقستاننىڭ ستاتيگە 500 ملن دوللار تولەيتىنى تۋرالى شەشىم شىعارعان.

"اربيتاجدى شەشىم الدىن الا ورىندالۋ كەرەك، كەز كەلگەن ەلدە ول زاڭدى تۇردە مويىندالۋى ءتيىس. ستاتي ءبىرىنشى كەزەكتە مۇنى ۇلىبريتانيادا جۇزەگە اسىرماق بولعان. ول لوندون سوتىنان بۇعان الدىن الا بۇعات قويۋدى جانە ونى انگليادا زاڭدى تۇردە مويىنداۋدى سۇراعان. الايدا سوت ودان باس تارتقان", - دەدى ۆەدومستۆو باسشىسى.

ادىلەت مينيسترلىگىنىڭ سوزىنە قاراعاندا ستاتي اقش-قا دا جۇگىنگەن. الايدا قازاقستان ونىڭ لوندونداعى الاياقتىعىنا قاتىستى قارسى تالاپ ارىزىن جولداعان. تىڭداۋلار وسى جىلدىڭ قازان ايىنا جوسپارلانعان.

بەكەتاەۆتىڭ سوزىنشە، اقش پەن انگلياداعى اربيتاجدى شەشىمنىڭ ورىندالۋىنا قول جەتكىزە الماعاندىقتان ستاتي شۆەتسيا، بەلگيا جانە نيدەرلاندى سوتىنا دا شاعىم تۇسىرگەن. وسى ەلدەردە ول قاراجاتتى الدىن الا بۇعاتتاۋدى باستاعان. بىراق قاراجات ماسەلەسى كەزەڭ كەزەڭىمەن شەشىلەتىن بولادى.

"ول اربيتاجدى شەشىمدى زاڭدى دەپ تانۋدى سۇراپ وتىر. ءبىز بۇعان ۇلىبريتانيادا قالاي قارسى بولساق، باسقا ەلدەردە دە سولاي ىستەيمىز. ستاتي زاۋىت قۇرىلىسى ءۇشىن قاراجات سالماي، ونى لاتۆيالىق بانكتەگى شوتىنا اۋداردى. اربيتاجدى شەشىمدەگى وتەماقىنىڭ ءبىر بولىگى - گاز وڭدەۋ زاۋىتىنىڭ وتەماقىسى. بۇل شەشىمدە سالىنىپ بىتپەگەن زاۋىتتىڭ قۇنى 230 ملن دوللارعا باعالانىپ وتىر. ءبىزدىڭ مالىمەت بويىنشا لاتۆيالىق بانك سوتىنا 167 ملن دوللار اۋدارىلعان، ياعني زاۋىت قۇنى بۇرمالانعان. ءبىز وسى فاكتىلەرگە بايلانىستى ءوزىمىزدى قورعايتىن بولامىز. ستاتي زاۋىتتىڭ ناقتى قۇنىن جاسىرعان", - دەدى ول.

ايتا كەتەيىك، وتكەن جىلدىڭ جەلتوقسان ايىندا  امەريكالىق Bank of New York Mellon سوت ىسىنە بايلانىستى قازاقستان ۇلتتىق قورىنىڭ 22 ملرد دوللارىنا بۇعات قويعان. ۇلتتىق قور قارجىسىنىڭ بۇعاتتالۋىنا مولدوۆالىق بيزنەسمەن اناتولي ءستاتيدىڭ ارىزى سەبەپ. سەبەبى مولدوۆالىق ميلليونەر ستاتي وسىدان 4 جىل بۇرىن "قازاقستان مولدوۆا ينۆەستيتسيالارىنا قاتىستى ەنەرگەتيكالىق حارتيا تۋرالى شارتتى بۇزدى" دەپ قازاقستاننان 500 ملن دوللار الماق بولعان.

“The Qazaq Times”